“Qarabağ” - “Sumqayıt” oyununda iki yubiley qeydə alınıb
Bakı, 11 dekabr, AZƏRTAC
Abdullah Zubir “Qarabağ”da 50-ci qolunu vurub.
AZƏRTAC Peşəkar Futbol Liqasının rəsmi saytına istinadən xəbər verir ki, bu, Azərbaycan Premyer Liqasının XVI turuna təsadüf edib. 32 yaşlı fransalı yarımmüdafiəçi “Sumqayıt”la səfər matçında qol sevinci yaşayıb.
Zubir Ağdam klubunda 236-cı oyununda 50-ci qolunu vurub. O, Premyer Liqada 38, ölkə kubokunda 1, avrokuboklarda 11 dəfə fərqlənib.
Fransalı legionerin ilk qolu debüt etdiyi 2018-2019-cu illər mövsümündə qeydə alınıb. O, 2018-ci il sentyabrın 23-də “Qəbələ” ilə ev matçında (4:1) iki qola imza atıb.
“Sumqayıt”ın futbolçusu Murad Xaçayev isə Azərbaycan çempionatlarında 100-cü oyununu keçirib. 25 yaşlı müdafiəçi “Qarabağ”la ev görüşündə şans qazanıb. 100 oyunda 6 qol vuran M. Xaçayev yalnız “Sumqayıt”da forma geyinib. Onun debütü 2018-2019-cu illər mövsümünə təsadüf edib. Futbolçu 2018-ci il avqustun 18-də “Neftçi” ilə ev matçında (0:2) meydana çıxıb.
Qeyd edək ki, “Qarabağ” - “Sumqayıt” oyunu Ağdam təmsilçisinin 6:1 hesablı qələbəsi ilə yekunlaşıb.
Bölmənin digər xəbərləri
