Qarabağda yaşayan erməniəsilli Azərbaycan vətəndaşlarını xunta rejimindən xilas etməliyik – ŞƏRH
Bakı, 5 sentyabr, AZƏRTAC
Ermənistan tərəfi son təxribatlar zamanı itkilərinin və yaralılarının olduğunu açıqlayıb. Hesab edirəm ki, Azərbaycan Ordusu bunun davamı olaraq Qarabağdakı terrorçuları zərərsizləşdirməlidir. Sərhəddəki son hadisələri qiymətləndirdikdə bunun zərurət olduğunu görürük. Çünki Avropa İttifaqı Şurasının Prezidenti Şarl Mişel də məlumat yayıb ki, Laçın-Xankəndi və Ağdam-Xankəndi yolları ardıcıl və eyni anda açılmalıdır.
Bunu AZƏRTAC-a açıqlamasında “Həmvətənlərə Dəstək” İctimai Birliyinin təsisçisi, ehtiyatda olan polkovnik-leytenant, hərbi-siyasi ekspert Elmar Hüseyn söyləyib.
Onun sözlərinə görə, 2020-ci ilin noyabrında Ermənistanın imzaladığı kapitulyasiya aktının müvafiq bəndlərinin icrası labüddür. Necə ki, BMT-nin məlum dörd qətnaməsini Azərbaycan 30 ildən sonra təkbaşına həyata keçirdi. Biz bu hərbi əməliyyatı da aparmaq məcburiyyətindəyik. Bunu keçmiş məcburi köçkünlərimizin qayıdışı üçün, doğma torpaqlarımız olduğuna görə etməliyik. Eləcə də bu əməliyyat erməniəsilli Azərbaycan vətəndaşlarını həmin xunta rejiminin əlindən xilas etmək üçün lazımdır. Xankəndidə yaşayan erməniəsilli Azərbaycan vətəndaşları da həmin rejimin əlində girov qalıblar.
Polkovnik-leytenant qeyd edib ki, bu əməliyyat çox lokal ola bilər. Çünki Azərbaycan Ordusunun gücü artıq qarşı tərəfə məlumdur. Ermənilər 44 günlük Vətən müharibəsində qaçdıqları, Xankəndini və digər yerləri boşaltdıqları kimi, yenə də o əraziləri tərk edəcəklər. Burada maraqlı məqam isə ondan ibarətdir ki, bu dəfə qaçanda onları biz qarşılayacağıq.
“Əgər Rusiya sülhməramlı missiyasının cavabdehlik daşıdığı zonadakı Xankəndi ətrafında hazırda üçüncü silahlı birləşmə varsa, bu, qanunlarımıza, o cümlədən Konstitusiyamıza, Rusiya və Azərbaycan prezidentlərinin, eləcə də Ermənistan baş nazirinin imzaladığı üçtərəfli birgə Bəyanata ziddir. Kəlbəcər dövlət sərhədimizdir və orada erməni silahlılarının nə işi var? Ermənilər özləri təxribat törədirlər. Azərbaycan Müdafiə Nazirliyinin sonuncu videogörüntüləründə birinci zərbənin mövqelərimizə düşmən tərəfindən endirilməsi açıq-aydın göründü. Beləliklə, Ermənistan ordusu həm Azərbaycan əsgərinə hücum edir, həm də sosial şəbəkələrdə irimiqyaslı müharibənin başlanmasını elan edir. Düşmən əvvəlcə təxribat törədir, lakin bölmələrimiz cavab atəşi açanda bunu böyük döyüş kimi təqdim etməyə çalışır”, - deyə hərbi-siyasi ekspert vurğulayıb.
Ordumuzun gücü ilə əlisilahlı ermənilərin Azərbaycanın daxili sərhədlərindən mütləq şəkildə çıxarılmalı olduğunu diqqətə çatdıran E.Hüseyn əlavə edib: “Hansı silahlı erməni ərazimizdən çıxacaqsa sağ qalacaq, çıxmayalar isə məhv ediləcək. Üçtərəfli Bəyanat bu il noyabrın sonunadək məcburi şəkildə birmənalı olaraq yerinə yetirilməlidir. Bizim başqa yolumuz yoxdur. Həm özümüz, həm orada yaşayan erməniəsilli Azərbaycan vətəndaşları separatçı rejimdən xilas olunmalıdır”.
Bölmənin digər xəbərləri
