Qazaxıstan multimodal marşrutları gücləndirir
Astana, 27 may, AZƏRTAC
Qazaxıstandakı ən böyük logistika terminalları operatoru olan “Kedentransservis” ASC və Danimarkanın “Maersk” şirkəti bu ölkə ərazisində yüklərin terminal xidməti sahəsində əməkdaşlıq haqqında saziş imzalayıblar.
AZƏRTAC Qazaxıstan mediasına istinadla xəbər verir ki, saziş çərçivəsində “Kedentransservis” ASC konteynerlərin emalı və saxlanması üzrə xidmətlər göstərəcək, həmçinin filiallar şəbəkəsi boyunca ölkədaxili daşımaları təmin edəcək.
Artıq “Maersk” şirkətinə məxsus ilk konteyner partiyası “Kedentransservis” ASC-nin Astana filialının terminalına çatdırılıb.
İmzalanmış saziş “Maersk”in Mərkəzi Asiyada multimodal marşrutların inkişafı üzrə uzunmüddətli strategiyasının bir hissəsidir.
Əməkdaşlıq çərçivəsində planlaşdırılan müntəzəm tədarüklər sabit yük axını yaradacaq və Qazaxıstanın multimodal nəqliyyat sisteminin genişlənməsinə töhfə verəcək. Bu da öz növbəsində, Qərb və Şərq arasında ölkənin etibarlı tranzit körpüsü kimi mövqeyini möhkəmləndirəcək.
Elşən Rüstəmov
AZƏRTAC-ın xüsusi müxbiri
Astana
Bölmənin digər xəbərləri
