DÜNYA
QAZAXISTAN RUSİYA İLƏ BİRLİKDƏ AVİASİYA-RAKET KOMPLEKSİ YARADIR
AZƏRTAC İTAR-TASS agentliyinə istinadla xəbər verir ki, Qazaxıstanda Rusiyanın köməyi ilə “İşim” aviasiya-raket kosmik kompleksi yaradılacaqdır. Bunu Moskva İstilik Texnikası İnstitutu baş direktorunun müavini Aleksandr Dorofeyev Astanada açılmış “Sənayeli və innovasiyalı Qazaxıstan” sərgisində bildirmişdir.
Hazırda Qazaxıstanda neft və qaz kəmərlərinin monitorinq sistemi yaradılır. Bundan ötrü Qazaxıstan dövləti ilkin yoxlama üçün 2 peyk, neft və qaz infrastrukturunun vəziyyətinin monitorinqi üçün 6 peyk buraxmaq niyyətindədir. “İşim” kompleksi belə peyklərin kosmosa buraxılması üçün nisbətən ucuz üsuldur. A.Dorofeyevin sözlərinə görə, “İşim” vasitəsilə yüngül peyklərin buraxılması hazırda mövcud vasitələrdən 3-4 dəfə ucuz başa gəlir.
Qazaxıstan tərəfi kompleksin rəsmi təqdimat mərasimini noyabr ayında Almatıda keçirməyi planlaşdırır.