Qazaxıstanın Parlament Məclisinin sədri: Türk xalqlarının birləşməsində Heydər Əliyevin böyük rolu olub
Bakı, 16 may, AZƏRTAC
Heydər Əliyev tarixi şəxsiyyət, dövrünün dahi lideri, müasir Azərbaycan dövlətinin banisi və xilaskarıdır. Dahi şəxsiyyət, müdrik siyasi xadim bütün həyatını Azərbaycan xalqına xidmətə həsr edib.
AZƏRTAC xəbər verir ki, bu sözləri Milli Məclisin Ümummilli Lider Heydər Əliyevin 100 illiyinə həsr olunmuş xüsusi iclasında Qazaxıstanın Parlament Məclisinin sədri Yerlan Koşanov bildirib.
Yerlan Koşanov Heydər Əliyev dühasının nəinki Azərbaycan, həmçinin bütün Türk dünyası üçün mənəvi oriyentirə çevrildiyini bildirərək deyib: “Ulu Öndər Heydər Əliyev Qazaxıstanda xalqlarımız arasında səmimi qardaşlıq münasibətlərinin qurulmasına çalışması ilə tanınır. Heydər Əliyev əlaqələrimizin əbədi və möhkəm olması üçün böyük səylər göstərib. Azərbaycan Türk dünyasının mərkəzlərindən biridir. Türk xalqlarının birləşməsində Heydər Əliyevin böyük rolu olub. Türk Dövlətləri Təşkilatının əsası da Naxçıvanda qoyulub. Bu fakt özlüyündə dərin rəmzi mənaya malikdir”.
Bu gün Azərbaycanın dinamik inkişaf etdiyini söyləyən Qazaxıstan Parlament Məclisinin sədri vurğulayıb ki, qardaş xalqın müvəffəqiyyətlərinə çox sevinirlər. O bildirib ki, BMT-nin Təhlükəsizlik Şurasının qətnamələrinə əsasən öz ərazi bütövlüyünü bərpa edən qardaş Azərbaycan inkişafının yeni mərhələsinə qədəm qoyub. Əminliklə bildirilib ki, Prezident İlham Əliyevin rəhbərliyi ilə Azərbaycan daha böyük uğurlar əldə edəcək və dünya tarixinə öz adını yazacaq.
Bölmənin digər xəbərləri
