Qənirə Paşayeva: Qubadlı əməliyyatı hərbçilərimizdən fədakarlıq və xüsusi peşəkarlıq tələb edirdi
Bakı, 25 oktyabr, AZƏRTAC
Qubadlı əməliyyatı 44 günlük Vətən müharibəsinin şanlı səhifəsini təşkil edir.
Azərbaycan Silahlı Qüvvələri 2020-ci ili sentyabrın 27-də başlanan uğurlu hərbi əməliyyatları davam etdirərək, oktyabrın 23-də Qubadlı ərazisinə daxil oldu. Rayonun Zilanlı, Kürdmahruzlu, Muğanlı və Alaqurşaq kəndləri işğalçılardan azad edildi.
Vətən müharibəsinin 29-cu günündə, yəni oktyabrın 25-də Azərbaycan Ordusu Qubadlı şəhərini və rayonun daha bir neçə kəndini azad etdi. Şəhərin azad edildiyini Prezident, Müzəffər Ali Baş Komandan İlham Əliyev özünün tviter hesabından elan etdi. O həyəcanlı günləri yaxşı xatırlayırıq. Prezidentin müharibə dövrü öz sosial media hesablarından etdiyi paylaşımlar, xalqa müraciətlər ən yeni dövr tariximizin unudulmaz “qızıl” səhifələridir.
Bu fikirləri AZƏRTAC-a açıqlamasında Milli Məclisin Mədəniyyət komitəsinin sədri Qənirə Paşayeva bildirib.
Qubadlı rayonunun Azərbaycan Ordusu tərəfindən cəmi bir neçə günə azad edildiyini diqqətə çatdıran Q.Paşayeva deyib: “Düşmən Qubadlı şəhərində güclü istehkamlar qurmuş, yüksəkliklərdə hərbi birləşmələr yerləşdirmişdi. Qubadlı əməliyyatı hərbçilərimizdən fədakarlıq və xüsusi peşəkarlıq tələb edirdi. Azərbaycanın Silahlı Qüvvələrinin bütün mənsubları yüksək səviyyədə fədakarlıq və qəhrəmanlıq nümayiş etdirdilər.
Qırx dörd günlük müharibə başa çatdıqdan sonra Prezident bir sıra mühüm dövlət təltifləri barədə sərəncam imzaladı. Bu dövlət təltiflərindən biri də “Qubadlının azad olunmasına görə” medalıdır. “Qubadlının azad olunmasına görə” medalı Qubadlı rayonunun işğaldan azad edilməsi uğrunda aparılmış döyüş əməliyyatlarında iştirak edərək şəxsi igidlik və şücaət nümayiş etdirmiş hərbi qulluqçularımıza verilir. Azərbaycan Silahlı Qüvvələrimizin 15 min 189 hərbi qulluqçusu bu medalla təltif olunub”.
Mədəniyyət komitəsinin sədri Qubadlı ərazisində bir çox qala, türbə, körpü və digər maddi mədəniyyət nümunələri, abidələr olduğunu diqqətə çatdırıb. Onların bir çoxu işğal illərində dağıdılıb, zərər görüb, yaxud erməniləşdirilməsinə, özgələşdirilməsinə cəhd olunub. Erməni vandalizmi Qubadlıdan da yan keçməyib: “Qubadlı ərazisində tarixə yoldaşlıq etmiş, qoruq, gözətçi funksiyasını yerinə yetirmiş qalalar mövcud olub. Əliquluuşağı kəndində Göy qala (V əsr), Muradxanlı kəndində "Qalalı" qalası, Xocamisaxlı kəndində Qala və digərləri rayon işğal olunana qədər qalırdı. Xocamisaxlı kəndinin qədim adı Qalacıq olub.
Qubadlı ərazisində tarixin müxtəlif dövrlərində tikilmiş türbələr öz gözəlliyi ilə seçilib. Balahəsənli kəndindəki "Cicimli" ocağı, Dəmirçilər kəndindəki türbə, Gürcülü kəndindəki "İmamzadə", Yazıdüzündəki Cavanşir türbəsi və başqaları buna misaldır”.
Q.Paşayevanın sözlərinə görə, ərazisindən iki bol sulu çay axan Qubadlıda çaylar üzərindən körpülərin salınması zamanın tələbi, təbiətin “sifariş”i olub. Rayon ərazisində üç qədim körpü olub. Körpülərdən ən qədiminin Qarakişilər kəndindəki "Sınıq körpü" olduğu bilinir. Digər iki körpü -Azərbaycan Mədəniyyət Nazirliyi tərəfındən qeydə alınmış Laləzar və Hacı Bədəl körpüsü bir qədər sonrakı dönəmə aiddir: maraqlı arxitekturası olan Laləzar (1867) və Hacı Bədəl körpüləri XIX əsrə aiddir. Hər iki körpü rayon işğal olunana qədər öz funksiyasını gərəyincə yerinə yetirirdi. - “İşğal olunanadək” deyirik, çünki erməni işğalçılarının ayağı hara dəyibsə, orada mədəniyyət, insanlıq qeybə çəkilib... Körpü mədəniyyət deməkdi, körpü xeyirxahlıq deməkdi - ermənilər üçünsə bunlar yad anlayışlar olub...
Qubadlının işğaldan azad edilməsi tarixi hadisəydi. Qubadlı şəhərinin azad edilməsinin Zəfərimizi daha da yaxınlaşdırdığı öz təsdiqini tapmış hadisədir.
“Qubadlının azad olunmasından bir il ötür. 30 ilə yaxın bu rayona və dövlətimizə vurulan zərəri bərpa etmək çox vaxt alacaq; bir sıra itkilərin yerini doldurmaqsa, sadəcə mümkünsüzdür. Ermənistan işğalı zamanı Qubadlıda 94 yaşayış məntəqəsi, 7278 fərdi yaşayış evi, 64 inzibati bina, 148 sosial obyekti, 161 mədəniyyət obyekti, 7 məscid, 16 körpü dağıdılmış və yararsız vəziyyətə salınmışdır. 1080 ədəd kənd təsərrüfatı obyekti, 650 km avtomobil yolu, 2 su anbarı, 150 km magistral su xətləri, 4830 km elektrik xətləri, 165 km magistral qaz boru xətti, 9 tikinti idarəsi, 4 yol idarəsi, 18 ədəd dəyirman, 4 ədəd su nasos stansiyası, 120 ədəd elektrik yarımstansiyası və transformatorlar tamamilə dağıdılmışdır.
Ermənistan Qubadlı rayonunun Xanlıq qəsəbəsində qanunsuz məskunlaşma aparmışdı. Livandan və digər xarici ölkələrdən gətirilən haylar burada qanunsuz yollarla yerləşdirilmişdi. Bu, özü bir müharibə cinayətdir.
Hər kəs bilir ki, işğal edilmiş ərazilərdə qanunsuz məskunlaşma aparmaq cinayətdir - işğalın nəticələrindən sui-istifadə halıdır”.
Q.Paşayeva vurğulayıb ki, maddi ziyan bir şəkildə aradan qaldırılacaq, amma təəssüf ki, bunu mənəvi ziyan barədə demək mümkün deyil: “Bəs 27 illik işğalın mənəvi ziyanlarını tezliklə aradan qaldırmaq necə mümkün olacaqmı? İşğalçı ölkə bunun üçün nə kimi öhdəliklər götürür? Hələ ki, etiraf və öhdəlik yerinə revanşist çağırışlar daha çox eşidilir ki, bunun da ilk növbədə (adı üstündə “uğursuz dövlət” olan) Ermənistana ziyanı olacaq. Azərbaycanın “Dəmir yumruğ”u yerindədir. Bunu gərək Ermənistanda unutmasınlar.
Bölmənin digər xəbərləri
