QHT-lər Prezidentin uzaqgörən siyasətini dəstəkləyir və milli birlik mesajı verirlər ŞƏRH
Bakı, 12 noyabr, AZƏRTAC
Prezident İlham Əliyevin dövlətimizin güclənməsi və xalqımızın rifahı naminə həyata keçirdiyi çoxşaxəli fəaliyyəti Azərbaycanın milli ruhunu və beynəlxalq nüfuzunu yeni səviyyəyə yüksəldib. Dövlətimizin başçısının uzaqgörən və qətiyyətli siyasəti nəticəsində ölkəmizdə elə bir inam və güc formalaşıb ki, bu, doğrudan da müasir tariximizdə böyük və unudulmaz bir səhifə kimi qalacaq. Azərbaycan xalqı hər zaman öz Prezidentinin ətrafında sıx birləşərək, onun müəyyənləşdirdiyi inkişaf və ədalət yolunu dəstəkləyir. Prezident İlham Əliyev həyata keçirdiyi tədbirlərlə, xüsusilə də torpaqlarımızın işğaldan azad olunması və xalqımızın milli qürurunun bərpa edilməsi istiqamətində atdığı addımlarla böyük tarixi missiyanı yerinə yetirib. Bu, Azərbaycan xalqının birliyini, dövlətimizin əzmini və Liderimizin qətiyyətini bir daha parlaq şəkildə nümayiş etdirib. Prezidentimizin bu fəaliyyəti sülhün bərqərar olunmasına, genişmiqyaslı quruculuq işlərinin aparılmasına və beynəlxalq aləmdə Azərbaycanın nüfuzlu və etibarlı tərəfdaş kimi mövqeyinin möhkəmlənməsinə xidmət edir. Bütün bunlar xalqımızda böyük ruh yüksəkliyi və gələcəyə dərin inam yaradıb. Bu gün ölkəmizdə aparılan islahatlar, həyata keçirilən sosial-iqtisadi layihələr və dövlət siyasətinin ardıcıl icrası da həmin inamın və liderimizin uzaqgörən strategiyasının bariz təzahürüdür.
Bu fikirləri AZƏRTAC-a açıqlamasında “Vətəndaşların Sosial Rifahı Naminə” İctimai Birliyinin sədri İradə Rizazadə söyləyib.
Azərbaycanın qlobal tədbirlərə uğurlu ev sahibliyi barədə danışan İ.Rizazadə bildirib ki, bu yaxınlarda bir ili tamam olan COP29 tədbiri müasir tariximizin mühüm hadisələrindən biri idi. Həmin tədbir çərçivəsində yerli və beynəlxalq vətəndaş cəmiyyəti institutları üçün geniş imkanlar yaradıldı, fikir və təcrübə mübadiləsinə şərait təmin olundu. Bu, Azərbaycanın ekoloji siyasətinin uğurlu icrasının və diplomatik nüfuzunun artmasının bariz göstəricisidir. Eyni zamanda, Qlobal Cənub Platformasının məhz Bakıda yaradılması prosesində qeyri-hökumət təşkilatları əsas və fəal rol oynadılar. Həmin platformanın fəaliyyətində QHT-lər fəal iştirak edir, artıq beynəlxalq müstəvidə də mühüm görüşlər və tədbirlər həyata keçirilir. Bu fakt Azərbaycanın vətəndaş cəmiyyətinin regional və qlobal səviyyədə artan nüfuzunun göstəricisidir.
O qeyd edib ki, əvvəllər QHT-lər üçün belə imkanlar və geniş fəaliyyət mühiti mövcud deyildi, lakin bu gün vəziyyət tamamilə dəyişib. Artıq Azərbaycan qeyri-hökumət təşkilatları öz gücünü göstərir, həm ölkə daxilində, həm də beynəlxalq arenada fəal şəkildə təmsil olunurlar. Bu, Prezidentimizin QHT sektoruna göstərdiyi diqqət və dəstəyin nəticəsidir. Biz, QHT-lər olaraq, görürük ki, qeyri-hökumət təşkilatlarının inkişafı üçün dövlət səviyyəsində çox geniş şərait yaradılıb. Bu gün QHT-lər həm ölkə daxilində mühüm sosial və ictimai layihələr həyata keçirir, həm də beynəlxalq səviyyədə Azərbaycan həqiqətlərini dünyaya çatdırır. Bu, həm də vətəndaş cəmiyyətinin dövlət siyasəti ilə vəhdətinin göstəricisidir.
“Konstitusiya və Suverenlik İli” çərçivəsində keçirilən əməkdaşlıq forumunda qeyri-hökumət təşkilatları adından Azərbaycan Prezidentinə ünvanlanan müraciətə toxunan İ.Rizazadə deyib ki, həmin müraciətdə bütün QHT-lər dövlətimizin başçısının apardığı siyasəti, haqq-ədalət naminə gördüyü işləri tam dəstəklədiklərini və alqışladıqlarını bildiriblər. Bu təşəbbüs bir daha göstərdi ki, vətəndaş cəmiyyəti ölkə rəhbərinin siyasi kursuna və ədalət prinsiplərinə sadiqdir. 30 ilə yaxın işğal altında olan torpaqlarımız artıq azad edilib. Biz QHT nümayəndələri kimi dəfələrlə həmin ərazilərə səfər edib, tikinti və bərpa işlərini öz gözlərimizlə görmüşük. Yolların salınması, köçkünlər üçün evlərin tikilməsi, infrastrukturun yaradılması inanılmaz sürətlə həyata keçirilir və bu, xalqımızın birliyini, dövlətimizin qüdrətini nümayiş etdirir”, - deyə QHT sədri əlavə edib.
Oktyabrın 20-də keçirilən qeyri-hökumət təşkilatlarının əməkdaşlıq forumunun əhəmiyyətini vurğulayan İradə Rizazadə diqqətə çatdırıb ki, aktual mövzular üzrə müzakirələrin aparıldığı bu tədbirin ən təsirli məqamı məkanın Xankəndi olması idi. Bu hadisə Azərbaycanın tarixi Qələbəsinin və ərazi bütövlüyünün bərpasının rəmzi kimi yadda qaldı. Bu, tarixi ədalətin qələbəsidir və biz Prezidentimizin siyasətini hər zaman dəstəkləyirik. Qarabağın azadlığı Azərbaycan xalqının birliyinin, dövlətimizin gücünün və Liderimizin qətiyyətinin təzahürüdür.
Bölmənin digər xəbərləri
