Qırğız ekspert: WUF13 Bakının beynəlxalq şəhərsalma platformasında mövqeyini daha da gücləndirir
Bakı, 18 may, AZƏRTAC
BMT-nin Ümumdünya Şəhərsalma Forumunun 13-cü Sessiyasının (WUF13) Bakıda keçirilməsi Azərbaycanın beynəlxalq şəhərsalma və memarlıq platformasında mövqeyinin daha da güclənməsinə mühüm töhfə verir.
Bu fikri Qırğızıstanın “Elizaveta” tikinti şirkətinin meneceri Artur Sobetbekov WUF13 çərçivəsində AZƏRTAC-a açıqlamasında deyib.
O qeyd edib ki, forum şəhərsalma və tikinti sahəsində beynəlxalq təcrübə mübadiləsi baxımından xüsusi əhəmiyyət daşıyır: “Buraya gələn nümayəndələr müxtəlif ölkələrin aparıcı mütəxəssisləridir. Onlar Bakını, burada həyata keçirilən layihələri və təqdim olunan yenilikləri yaxından görürlər. Bu, şəhərin beynəlxalq nüfuzunun artmasına xidmət edir”.
Artur Sobetbekov əlavə edib ki, Qırğızıstanda tikinti sektoru son illərdə sürətlə inkişaf edir və WUF13 bu sahədə yeni yanaşmaların öyrənilməsi üçün mühüm imkan yaradır.
“Qırğızıstanda tikinti sektorunda əsas inkişaf son 3-5 ildə müşahidə olunur. Əvvəllər də tikinti işləri aparılırdı, lakin hazırkı miqyasda inkişaf və tikinti bumunun şahidi olmamışdıq. Bu tədbir isə bizə hansı istiqamətdə inkişaf etməli olduğumuzu, hansı təcrübələri tətbiq edə biləcəyimizi göstərir. Azərbaycan şəhərsalma və memarlıq sahəsində artıq ciddi təcrübəyə malikdir, böyük işlər görüb. Bu baxımdan burada potensialdan deyil, artıq formalaşmış uğurlu təcrübədən danışmaq olar”, – deyə o vurğulayıb.
Bölmənin digər xəbərləri
