Qırğızıstan “BARS” milli brendi altında elektromobil istehsal edəcək
Bakı, 14 avqust, AZƏRTAC
Qırğız Respublikası “BARS” milli brendi altında elektromobillərin istehsalına başlamağı planlaşdırır. Layihə minik avtomobillərinin, kommersiya nəqliyyat vasitələrinin və elektrik mühərrikli ixtisaslaşdırılmış nəqliyyat vasitələrinin istehsalına yönəlmiş avtomobil sənayesi klasterinin yaradılması çərçivəsində həyata keçirilir.
AZƏRTAC xəbər verir ki, “Kabar” agentliyi bu barədə Qırğızıstan İqtisadiyyat və Ticarət Nazirliyinə istinadla məlumat yayıb.
İlkin mərhələdə bu nəqliyyat vasitələri PKA – xaricdən gətiriləcək hazır hissələrin 50 faizlik yığılması üsulu ilə istehsal olunacaq. Daha sonra şirkət tam istehsal dövrünə keçməyi planlaşdırır. Bu, yerli avtomobil sənayesinin payını tədricən artıracaq, elektromobil komponentlərinin istehsalını quracaq, habelə yerli mühəndislik və texniki bazanı inkişaf etdirəcək.
Zavodun istehsal gücü ildə 10.000 nəqliyyat vasitəsinə qədər olacaq. Layihə 15 hektar ərazidə həyata keçirilir və onun təxminən 100 iş yeri yaradacağı gözlənilir.
“BARS” elektrikli nəqliyyat vasitələrinin yalnız Qırğızıstanın daxili bazarına deyil, həm də Mərkəzi Asiya və Avrasiya İqtisadi İttifaqı ölkələrinə tədarük ediləcəyi bildirilir.
Nazirliyin məlumatına görə, layihə hazırda 75 faiz tamamlanıb. İstehsalın 2026-cı ilin üçüncü rübündə başlaması planlaşdırılır və maliyyələşdirmə təşəbbüskarın öz vəsaiti hesabına təmin edilir. Dövlət isə bu layihəyə torpaq sahəsi təmin etməklə dəstək göstərib.
Nazirlik qeyd edir ki, layihə Qırğızıstanın avtomobil mühəndisliyi sənayesini inkişaf etdirəcək, müasir istehsal texnologiyalarını tətbiq edəcək, yeni iş yerləri yaradacaq və ölkənin ixrac potensialını genişləndirəcək.
Bölmənin digər xəbərləri
