Qış mövsümündə Şahdağ Qış-Yay Turizm Kompleksinə 97 min turist gəlib VİDEO
Qusar, 29 aprel, Elxan Yusifli, AZƏRTAC
Qusar rayonunun ərazisində yerləşən Şahdağ Qış-Yay Turizm Kompleksinə bu qış mövsümündə 97 min turist gəlib. İstirahətə gələn turistlərin təxminən 20 faizini əcnəbilər təşkil edib.
Şahdağ Qış-Yay Turizm Kompleksinin müdiriyyətindən AZƏRTAC-a bildirilib ki, əcnəbilər əsasən Türkiyə, İran, Rusiya, Almaniya, İspaniya, Hollandiya, İsveçrə və Avstriyadan olan turistlərdir.
Kompleksdə bu qış mövsümündən etibarən yeni qondola qaldırıcısı işə salınıb. Bununla da xizəkçilər 6 yeni xizək enişindən istifadə etmək imkanı qazanıblar. Ötən mövsümdə sürüşmə zolaqlarının ən yüksək nöqtəsi 1435 metr idisə, hazırda bu göstərici 2100 metrə çatır. Ərazini daim qarla təmin etmək üçün 160 ədəd süni qar generatoru quraşdırılıb.
Bununla yanaşı, bu mövsümdə kompleksin ərazisində 5 müxtəlif kafe və restoran istifadəyə verilib, beşulduzlu “Park Chalet” oteli və “Qaya Residences” fəaliyyətə başlayıb.
Şahdağ Qış-Yay Turizm Kompleksində qış turizm mövsümünə aprel ayının ilk ongünlüyündə yekun vurulub.
İstirahət mərkəzində yay turizm mövsümünün açılışı isə iyun ayının 20-nə nəzərdə tutulub. Bu yay mövsümündə istirahət mərkəzində ilk dəfə olaraq açıq havada hovuz istifadəyə veriləcək və burada müxtəlif su əyləncələri təşkil ediləcək. Bununla yanaşı istirahət mərkəzində turistlər üçün müxtəlif növ əyləncə və idman oyunları da planlaşdırılır. Turistlər yay mövsümündə burada dağ səyahətləri, uşaqlar və böyüklər üçün mini kvadrosikllərlə gəzintilər, kiçik yaşlı uşaqların (12 yaşa qədər) nəzarət altında əylənməsi üçün yırğalanan qalalar, peyntbol, qruplar üçün Skandinaviya gəzintisi, səmtləşmə idmanı və digər xidmətlərdən yararlana biləcəklər.
Bölmənin digər xəbərləri
