RAMAZAN BAYRAMI MÜNASİBƏTİLƏ ŞEYXÜLİSLAMIN TƏBRİKİ
Möhtərəm həmvətənlərim, əziz qardaş və bacılarım!
Dünya müsəlmanlarının əziz günü - mübarək Ramazan bayramı münasibətilə hamınızı səmimi qəlbdən təbrik edir, Uca Allahdan oruclarınızın qəbul, dualarınızın müstəcəb olmasını diləyirəm.
Həmd-səna olsun O bir Olan Yaradana ki, Onun mərhəmət və məğfirəti sayəsində müsəlmanlar bu mübarək ay boyunca ibadət və zikrlə məşğul olub, İlahi hökmlərə əməl etdilər. Orucunu tutmuş, Allahın haram buyurduqlarından çəkinmiş, Tanrı borcundan çıxmış insanların sevinc bayramı olan mübarək Ramazani-Şərifin fəzilət və kəramətindən qəlbində Allah məhəbbəti yaşadan millətimizin savabı. İnşallah, xeyir-bərəkət, sülh və əmin-amanlıq olacaqdır.
Azərbaycan inkişafının parlaq mərhələsinə, tərəqqi və rifah yoluna qədəm qoymuşdur və biz inanırıq ki, bu istiqamətdə irəliləyən dövlətimizi və xalqımızı, Allahın rizası ilə daha gözəl sabah gözləyir. Qoy Ulu Yaradan möhtərəm dövlət başçımız İlham Əliyevin rəhbərliyi altında xalqımızın uğurlarını artırsın, dövlətimizin daha da qüdrətlənməsinə rəvac versin, millətimizi Böyük Qarabağ Qələbəsinə qovuşdursun!
Allaha məhəbbət və itaət, bəşərə mərhəmət və dözümlülük təlqin edən, ən yüksək insani hissləri təcəssüm etdirən mübarək Ramazan bayramı münasibətilə bütün mömin qardaş və bacılarımızı təbrik edir, Ulu Yaradana üz tutub dua edirəm ki, orucumuzun əcri olaraq Öz Lütfü sayəsində bizlərə xeyir və bərəkətini artırsın, salehliyi və təqvanı davranış tərzinə çevirsin, insanlar arasındakı məhəbbəti və qardaşlığı möhkəm qılsın, mənəvi birliyimizi gücləndirsin, xalqımızın haqq işinin təntənəsini yaxınlaşdırsın. Qoy bu mübarək bayram hər birinizin evinə sevinc və rifah bəşx etsin. Amin!
Vəs-səlamu əleykum və rəhmətullahi və bərəkatuhu!
Şeyxülislam Allahşükür Paşazadə,
Qafqaz Müsəlmanları İdarəsinin sədri
