Regionlarda “Qurtuluşdan Zəfərə gedən yol, Müzəffər lider - miqrasiya kontekstində” mövzusunda tədbirlər keçirilib
Bakı, 29 dekabr, AZƏRTAC
Dövlət Miqrasiya Xidmətinin (DMX) regional idarələri “Heydər Əliyev İli” çərçivəsində həyata keçirdikləri silsilə tədbirləri davam etdirirlər.
Qurumdan AZƏRTAC-a bildiriblər ki, növbəti tədbir Dövlət Miqrasiya Xidmətinin Ağsu və Lənkəran regional miqrasiya idarələri tərəfindən Ümummilli Lider Heydər Əliyevin anadan olmasının 100 illiyi münasibətilə “Qurtuluşdan Zəfərə gedən yol, Müzəffər lider - miqrasiya kontekstində” və “Heydər Əliyev və Azərbaycan” mövzularında keçirilib.
Göyçay ilə Cəlilabadda təşkil edilən görüşlərdə Ümummilli Liderin və şəhidlərimizin əziz xatirəsi bir dəqiqəlik sükutla anılıb.
Tədbirlərdə Ulu Öndərin zəngin həyat yolu, siyasi fəaliyyəti, dövlət quruculuğunun bütün sferalarında, həmçinin miqrasiya sahəsinin inkişafı istiqamətindəki misilsiz xidmətləri barədə geniş məlumat verilib. Bildirilib ki, əsası Ulu Öndər tərəfindən qoyulmuş Azərbaycanın davamlı inkişaf siyasəti Prezident, Müzəffər Ali Baş Komandan İlham Əliyev tərəfindən uğurla davam və inkişaf etdirilir.
Həmçinin hazırda DMX tərəfindən bir sıra çevik və təşkilati tədbirlər həyata keçirilməklə miqrasiya siyasətinin müasir dövrün tələblərinə uyğun formalaşdırılması istiqamətində əhəmiyyətli işlərin görüldüyü də diqqətə çatdırılıb.
Sonda iştirakçıları maraqlandıran suallar cavablandırılıb.
Bölmənin digər xəbərləri
