Rektor: 20-dən çox məktəbi əhatə edən inklüziv təhsil şəbəkəsi formalaşıb
Bakı, 16 aprel, AZƏRTAC
“İnklüziv təhsildən inklüziv cəmiyyətə” ideyası bu gün geniş bir şəbəkəni formalaşdıran platformaya çevrilib. 2022-ci ilin aprel ayında autizm aylığı çərçivəsində əsası qoyulmuş bu təşəbbüs hazırda ölkə üzrə 1000-ə yaxın müəllimi bir araya gətirən, müxtəlif sorğular, təlimlər və müzakirələr vasitəsilə platformaların birləşdiyi əməkdaşlıq şəbəkəsi kimi fəaliyyət göstərir.
AZƏRTAC xəbər verir ki, bu fikirləri Bakı Slavyan Universitetinin rektoru Anar Nağıyev “İnklüziv təhsildən inklüziv cəmiyyətə: dayanıqlı və inklüziv universitet modeli” mövzusunda IV beynəlxalq elmi-praktik konfransda deyib.
Rektor bildirib ki, bu beynəlxalq müzakirə platforması artıq pedaqojiyönümlü ali təhsil müəssisələrində inklüziv təhsilin öyrənilməsi, uyğun mühitin formalaşdırılması, məzmunun hazırlanması və bacarıqların inkişafına xidmət edən mühüm bir platforma rolunu oynayır: “Ali təhsil müəssisəsi olaraq digər tərəfdaşlarla birlikdə əlilliyi olan və sağlamlıq imkanları məhdud şəxslər üçün inklüziv təhsilin təşkili istiqamətində qarşıya qoyulan vəzifələr icra edilir. Layihə çərçivəsində indiyədək 900-ə yaxın tədbir keçirilib, 1000-ə yaxın müəllim Bakıdakı 20-dən çox məktəblə koordinasiya şəklində fəaliyyətə cəlb olunub”.
Bölmənin digər xəbərləri
