RESPUBLİKA GÜNÜNƏ HƏSR OLUNMUŞ “JEEP FESTİVAL”INA START VERİLMİŞDİR
Bakı, 28 may (AZƏRTAC). Mayın 28-də Gənclər və İdman Nazirliyinin dəstəyi və Azərbaycan Avtomobil Dilerləri Assosiyasiyasının təşkilatçılığı ilə Respublika gününə həsr olunmuş “jeep festival”ına start verilmişdir.
Azərbaycan Avtomobil Dilerləri Assosiyasının sədri Natiq Zərbəliyev bildirmişdir ki, festival iki mərhələdən ibarətdir. Birinci mərhələdə iştirakçıların Şəkiyə qədər yürüşü nəzərdə tutulmuşdur.
Azadlıq meydanından başlanan yürüşdə 12 jeep markalı avtomobil iştirak edir.
Mayın 29-da isə Şəkidə yarışın ikinci - əsas mərhələsi başlayacaqdır. “Trial” adlanan bu mərhələdə iştirakçılara daha 2 avtomobil qoşulacaqdır. Bu mərhələdə yüksək yerimə qabiliyyətli avtomobillərin yolsuzluq şəraitində ötüşməsi nəzərdən keçiriləcəkdir. Qaliblər iki mərhələnin yekununda müəyyənləşəcəkdir.
Festivalın daha maraqlı keçməsi üçün əlavə tədbirlər də nəzərdə tutulmuşdur.
Yarışla yanaşı, Şəkidə avtomobil sərgisi keçiriləcək, festival iştirakçılarının rayonun görməli yerlərinə səyahəti təşkil olunacaqdır.
Qeyd edək ki, festival artıq 4-cü dəfədir keçirilir.
Bölmənin digər xəbərləri
