Respublika Uşaq Kitabxanası Beynəlxalq Biomüxtəliflik Günü münasibətilə yarışma keçirəcəkdir
Bakı, 20 may (AZƏRTAC). F.Köçərli adına Respublika Uşaq Kitabxanası Mədəniyyət və Turizm Nazirliyinin təşkilati dəstəyi ilə Bakı şəhər uşaq və gənclər yaradıcılıq mərkəzləri arasında “Dünyanın mədəniyyət rəngləri” adlı yarışma keçirəcəkdir.
Kitabxanadan AZƏRTAC-a bildirmişlər ki, 22 may - Beynəlxalq Biomüxtəliflik Günü münasibətilə təşkil olunan yarışmada Nəsimi, Sabunçu, Yasamal, Səbail, Binəqədi, Xətai, Nərimanov, Qaradağ, Xəzər, Suraxanı, Pirallahı və Nizami rayonlarının uşaq və gənclər yaradıcılıq mərkəzləri iştirak edəcəklər.
Hər bir yaradıcılıq mərkəzinin iştirakçıları müvafiq olaraq Türkiyə, Böyük Britaniya, Hindistan, Gürcüstan, Özbəkistan, İran, İspaniya, Rusiya, İtaliya, Tatarıstan (Rusiya Federasiyası), Yunanıstan, Hollandiyanı təmsil edəcəklər.
Yarışma təmsil olunan dövlət haqqında təqdimat-slaydların (video və ya foto) hazırlanması, milli rəqs, milli geyim (seçilən dövlətlərə mənsub kuklalara), milli kuklanın hazırlanması və şirma nağıl olmaqla 5 nominasiya üzrə nəzərdə tutulmuşdur.
Əsas məqsəd uşaqları dünya xalqlarının mədəniyyəti, adət və ənənəsi, ədəbiyyatı, musiqisi ilə tanış etmək, dostluq əlaqələrini möhkəmləndirmək, onlarda tolerantlıq hisslərini aşılamaqla istedadlı uşaqları üzə çıxarmaq, sağlam gələcəyimiz naminə ekologiyamızı qorumaqla uşaqları maarifləndirməkdir.
Yarışmanın açılışı mayın 22-də Beynəlxalq Muğam Mərkəzində olacaqdır. Tədbirdə musiqi məktəblərinin xor kollektivi iştirak edəcək, “Heydər Əliyev və uşaqlar”, “22 may - Beynəlxalq Biomüxtəliflik Günüdür”, “Biz birlikdəyik” adlı videoçarxlar nümayiş olunacaqdır.
Münsiflər heyətinin tərkibinə bir sıra qurumların nümayəndələri, mədəniyyət və incəsənət xadimləri daxildirlər.
Tədbirdə təmsil olunan 12 dövlətin səfirliklərindən nümayəndələr, UNİCEF-in Azərbaycandakı nümayəndəliyinin rəhbəri Mark Hervord, Ombusdmanın nümayəndəsi, Ailə, Qadın və Uşaq Problemləri üzrə Dövlət Komitəsinin, Mədəniyyət və Turizm və Təhsil nazirliklərinin əməkdaşları, uşaq yazarları, məktəblilər iştirak edəcəklər.
Yarışmanın yekun konserti və qaliblərin mükafatlandırılması mayın 26-da Beynəlxalq Muğam Mərkəzində keçiriləcəkdir.
Qalib kubokla yanaşı, diplom, müxtəlif hədiyyələr qazanacaqdır.
Nominasiyalar üzrə qaliblərə diplom və hədiyyələr veriləcəkdir. Həmçinin səfirliklərin, təşkilatların da qaliblərə hədiyyələri olacaqdır.
Yekun konsertində Bakı Xoreoqrafiya Məktəbinin rəqs kollektivi çıxış edəcək, hər bir rayonun kollektivlərinin ifasında mahnı və rəqslər təqdim olunacaqdır.
Bölmənin digər xəbərləri
