“Reuters” süni intellekt dövründə müxbir korpusuna investisiyaları artırır
Qahirə, 16 sentyabr, AZƏRTAC
“Reuters” agentliyi maliyyə və intellektual sərmayələrini birbaşa xəbər materialları hazırlayan və formalaşdıran müxbirlərə yönəldir. Süni intellekt isə xəbərlərin ötürülməsi, texniki emalı və rutin funksiyaları öz üzərinə götürür.
AZƏRTAC xəbər verir ki, bunu “Reuters” agentliyinin rəhbəri Pol Paskobert Dubayda keçirilən “Ərəb Media Sammiti”ndə çıxışı zamanı bildirib.
Jurnalistikanın süni intellekt dövründəki gələcəyinə nikbin yanaşdığını qeyd edən media rəhbəri vurğulayıb ki, agentlik kadr siyasətini və investisiya strategiyasını məqsədyönlü şəkildə quraraq əsas diqqəti birbaşa xəbər yaradan jurnalistlərə yönəldir.
Ərəb Yayım Şəbəkəsinin (ARN) aparıcısı Brandi Skottun moderatorluğu ilə keçirilən “Media sektorunun gələcəyi” adlı sessiyada çıxış edən Paskobert bildirib ki, işə qəbul siyasətindəki bu transformasiya yeni texnologiyaların yaratdığı məhsuldarlıq imkanlarından səmərəli istifadəyə əsaslanır.
Paskobertin sözlərinə görə, məhsuldarlığın artması şəraitində media qurumlarının qarşısında iki yol durur: ya işçi sayını azaltmaq, ya da mövcud heyətlə daha genişmiqyaslı iş görmək. O qeyd edib ki, hazırda dünyada agentliyin hələ də işıqlandırmağa imkan tapmadığı çoxsaylı xəbər nöqtələri mövcuddur və əsas məqsəd daha çox hadisəni oxuculara çatdırmaqdır.
Bu yanaşmanın regional səviyyədə, xüsusilə ərəbdilli jurnalistikada uğurla tətbiq oluna biləcəyini vurğulayan agentlik rəhbəri əlavə edib ki, yalnız tərcümə və texniki işlərlə məhdudlaşan fəaliyyətin həcmi azala bilər, lakin hadisələri birbaşa yerində işıqlandıran peşəkar müxbirlərə tələbat durmadan artır.
Süni intellekt texnologiyalarının tətbiqinin xəbərlərin dəqiqliyinə təsiri ilə bağlı narahatlıqlara toxunan Pol Paskobert bildirib ki, “Reuters” illərdir təkcə hazır alətlərin alınmasına deyil, həm də daxildə bu alətləri tətbiq edə biləcək və onlardan yaxşı istifadəyə imkan verəcək müvafiq bacarıqların formalaşdırılmasına sərmayə qoyur.
O vurğulayıb ki, agentlikdə sırf jurnalistika ehtiyacları üçün xüsusi hazırlanmış və redaksiya mütəxəssislərinin nəzarəti ilə tərtib edilmiş süni intellekt sistemlərindən istifadə olunur. Hər hansı material dərc edilməzdən əvvəl redaksiya və texniki heyət rəhbərlərindən ibarət xüsusi qurumun – Süni İntellekt üzrə İdarəetmə Şurasının təsdiqindən keçməlidir.
Çıxışın sonunda Paskobert süni intellekt sistemlərinin artıq ənənəvi məna daşımaqla yanaşı, xəbər agentliklərinin məhsullarının birbaşa istehlakçısı və ya müştərisi qismində də nəzərdən keçirilməli olduğunu bildirib.
Onun sözlərinə görə, “Reuters”in fəaliyyəti dörd əsas auditoriya qrupunun tələbatına uyğun kontentin hazırlanmasına əsaslanır. Maliyyə sektoru ilk növbədə operativliyə və mütləq dəqiqliyə üstünlük verir. Media qurumları keyfiyyətli vizual materiallar və fərqli hekayəçilik üsulları tələb edir. Ümumi əhali kütləsi geniş spektrli və kütləvi informasiyaya maraq göstərir. Rəqəmsal alətlər və sistemlər informasiyanı tamamilə fərqli texnoloji üsullarla əldə etmək istəyən platformaları əhatə edir.
Bölmənin digər xəbərləri
