Roma Sammiti: BMT kənd təsərrüfatı və yeni ərzaq sistemlərinə investisiya qoymağa çağırır
Bakı, 30 iyul, AZƏRTAC
Kənd təsərrüfatı sektoruna investisiyaların qoyulması - aclığın aradan qaldırılması məsələsində əsas məqamdır. AZƏRTAC xəbər verir ki, bu barədə Birləşmiş Millətlər Təşkilatının Ərzaq və Kənd Təsərrüfatı Təşkilatının (FAO) rəhbəri Tsuy Dunyuy BMT-nin Ərzaq Sistemləri üzrə İlkin Sammitin bağlanışında bildirib.
"Mən bir daha təkrar etmək istəyirəm: biz bütün enerjimizi kənd yerlərinə investisiyalara yönəltməliyik", - deyə Tsuy Dunyuy vurğulayıb.
Xatırladaq ki, bundan əvvəl BMT strukturlarının və dünya ölkələrinin nümayəndələri G20 dövlətlərinin xarici işlər nazirlərinin keçən ay İtaliyanın Matera şəhərində keçirilən toplantısında kənd təsərrüfatı sistemlərini dəstəkləməyin zəruriliyini bildirmişdilər. Onlar müvafiq bəyannamə qəbul etdilər.
BMT-nin məlumatına görə, 2020-ci ildə dünyada aclıq çəkən insanların sayı 811 milyona çatıb. Bu, 2019-cu illə müqayisədə 161 milyon çoxdur. COVID-19 pandemiyası qlobal iqtisadiyyata ciddi ziyan vurdu və mövcud ərzaq sistemlərinin səmərəsizliyini və etibarsızlığını ortaya çıxardı.
“Biz təbiətlə müharibə aparırıq və bu müharibənin bir hissəsi bütün istixana qazı tullantılarının üçdəbirini istehsal edən mövcud ərzaq sistemidir; planetin biomüxtəlifliyinin 80 faizini itirdiyimiz ərzaq sistemi”, - deyə sammitdə çıxış edərək, BMT-nin rəhbəri Antonio Quterreş bildirib.
BMT planetin bütün əhalisini sağlam, mükəmməl qida ilə təmin etməyə imkan verəcək yeni, daha ədalətli və daha ekoloji cəhətdən qlobal bir ərzaq sisteminin yaradılmasının zəruri olduğunu vurğulayır.
UNICEF və ÜST-nin rəhbərləri İlkin Sammitdə, həmçinin dünyada milyonlarla uşağın tam qidalanmadığını və ya kifayət qədər qida və vitamin almadığını, bunun da böyümə və inkişafın ləngiməsi ilə nəticələndiyini xatırladıblar. Henriyetta For və doktor Tedros Qebreyesus ölkələrin səlahiyyətlilərini uşaqların yaxşı qidalanmalarını təmin etmək üçün mümkün olan hər şeyi etməyə çağırıblar.
“UNICEF və ÜST hökumətləri və qərar qəbul edənlərin hamısını, yumurta, süd məhsulları, meyvə, tərəvəz və taxıl kimi qidalara qiymətləri aşağı salmağa imkan verəcək qiymət siyasəti və subsidiyalar yolu ilə sağlam qidalanmanın təşviqi də daxil olmaqla səmərəli yanaşmaları fəal şəkildə tətbiq etməyə və sağlamlıq üçün zərərli məhsullara vergiləri artırmağa çağırır", - deyə Henriyetta For və doktor Tedros Qebreyesusun birgə bəyanatında deyilir.
Xatırladaq ki, BMT-nin 2030-cu ilədək müəyyən etdiyi 17 Dayanıqlı İnkişaf Məqsədləri arasında aclıq və yoxsulluğun aradan qaldırılması, sağlam həyat tərzinin təmin edilməsi, məsuliyyətli istehlak və istehsal, həmçinin dəniz və quru ekosistemlərinin qorunub saxlanmasıdır. Bütün bu məqsədlər ərzaq sistemlərinin təkmilləşdirilməsi ilə ayrılmaz şəkildə bağlıdır.
"Əgər məsuliyyəti üzərimizə götürməsək və təcili tədbirlər görməsək, 2030-cu ildə görüşəndə aclığı və yoxsulluğu yox etmədiyimizi və dünyada 660 milyon insanın hələ də ac qaldığını bəyan etmək məcburiyyətində qalacağıq", - deyə FAO rəhbəri bildirib.
Romada keçirilən BMT-nin Ərzaq Sistemləri üzrə İlkin sammitdə 62 nazir də daxil olmaqla 108 ölkədən 500-dən çox nümayəndə iştirak edib. Görüşdə davamlı ərzaq sistemlərinin inkişafı, tədarük zəncirlərinin təkmilləşdirilməsi, səmərəli və ekoloji cəhətdən faydalı kənd təsərrüfatı üsulları, kiçik fermer təsərrüfatlarının dəstəklənməsi, şəhər təsərrüfatçılığı və bir çox digər məsələlər müzakirə edilib. BMT-nin Ərzaq Sistemləri üzrə Əsas Sammiti bu ilin sentyabrında keçiriləcək.
Bölmənin digər xəbərləri
