RUSİYA MİLLİ KİTABXANASINDA XOCALI SOYQIRIMININ 18-Cİ İLDÖNÜMÜNƏ HƏSR EDİLMİŞ KONFRANS KEÇİRİLƏCƏKDİR
Bakı, 22 fevral (AZƏRTAC). Azərbaycanın Sankt-Peterburq şəhərindəki baş konsulluğu Azərbaycanlıların Milli-Mədəni Muxtariyyəti ilə birlikdə fevralın 26-da Rusiya Milli Kitabxanasında XX əsrin ən qanlı faciələrindən olan Xocalı soyqırımının 18-ci ildönümünə həsr edilmiş konfrans keçiriləcəkdir.
Baş konsulluğun mətbuat xidmətindən bildirmişlər ki, tədbirdə şəhər ictimaiyyətinin, diplomatik missiyaların, Azərbaycan diasporunun, kütləvi informasiya vasitələrinin nümayəndələri və tələbələr iştirak edəcəklər.
Konfransda Sankt-Peterburqda nəşr edilmiş “Xocalı qırğını” kitabının təqdimatı olacaq, faciə barədə iştirakçılara ətraflı məlumat veriləcək, soyqırımından bəhs edən kitablar, CD-lər, broşürlər paylanacaq, videomateriallar nümayiş etdiriləcəkdir.
Faciə ilə bağlı fotosərgi açılacaq, Xocalı soyqırımına dair materiallar kitabxanaya təqdim olunacaqdır.
İslam Konfransı Təşkilatının Əməkdaşlıq və Dialoq uğrunda Gənclər Forumunun mədəniyyətlərarası dialoq üzrə baş əlaqələndiricisi Leyla xanım Əliyevanın irəli sürdüyü “Xocalıya ədalət” beynəlxalq kampaniyasının yeni müraciəti iştirakçılara təqdim ediləcək və kütləvi imzatoplama aksiyası təşkil olunacaqdır.
Tədbirin sonunda günahsız qurbanların ruhuna dualar oxunacaq, ehsan veriləcəkdir.
Bölmənin digər xəbərləri
