“Sabah” qəzeti: Ermənilərin “soyqırımı” yalanı əsrin böhtanıdır
Ankara, 24 aprel, AZƏRTAC
1915-ci ilin qondarma “soyqırımı” mifi ermənilər tərəfindən Türkiyənin beynəlxalq aləmdə mövqeyinə xələl gətirmək üçün israrla təbliğ olunur.
AZƏRTAC xəbər verir ki, bu barədə aprelin 24-də Türkiyənin “Sabah” qəzetində dərc olunan “Əsrin böhtanı – soyqırımı yalanı” sərlövhəli məqalədə deyilir.
Məqalənin müəllifi Harun Sekmen Osmanlı ordusunun arxa cəbhəsində Antanta ölkələrinin xeyrinə dinc əhaliyə divan tutan erməni quldur dəstələrinin vəhşiliklərinə və qanlı cinayətlərinə dair çoxsaylı arxiv sübutlarının olduğunu diqqətə çatdırıb.
Yazıda qeyd edilir ki, ermənilərin Anadoluda müsəlmanlara qarşı vəhşilikləri “tarixdə nadir hallarda rast gəlinən” miqyasa çatıb.
Müəllif bildirir ki, ermənilərin bir sıra ölkələrin fitvası ilə irəli sürdüyü soyqırımı iddialarının heç bir sübutu yoxdur. “1905-1920-ci illər arasında “daşnak” silahlı birləşmələri və “hnçak” quldur dəstələrinin Anadoluda 529.395 türkü qətlə yetirdiyi sənədləşdirilib”, -deyə məqalədə vurğulanır.
Eyni zamanda, 1821-1922-ci illərdə milyonlarla türkün qətlə yetirilməsinə, habelə 5,5 milyona yaxın insanın vaxtilə Osmanlı İmperiyasının nəzarətində olan Avropa ölkələrindən qovulmasına səbəb olan Qərb ölkələrinin cinayətlərinə də diqqət yetirilir.
Tarix professoru Necmettin Alkanın sözləri sitat gətirilərək qeyd olunur ki, hər bir dövlət ölkənin müstəqilliyini və bütövlüyünü qorumaq üçün üsyanları yatırmaq hüququna malikdir.
Professor əlavə edib: “Ermənilərin Osmanlı imperiyasının başqa ərazilərinə köçürülməsi qərarı məhz bu məqsədlər üçün verilib. Əks halda, Şərqi Anadoluda vəziyyət bu gün tamamilə fərqli olardı”.
Tarixçi xatırladıb ki, Anadolu erməniləri arasında separatçılıq əhvali-ruhiyyəsi 1880-ci illərin ortalarında başlayıb. “1890-cı illərdən başlayaraq ermənilər həm İstanbulda, həm də Şərqi Anadoluda təxribat və terror aktları həyata keçirməyə başladılar. Bu proseslərə qarşı çıxmaq Osmanlı dövlətinin təbii haqqı idi”, -deyə N. Alkan vurğulayıb.
Ramin Abdullayev
AZƏRTAC-ın xüsusi müxbiri
Ankara
Bölmənin digər xəbərləri
