İQTİSADİYYAT
Sahibkarlarla vergi qanunvericiliyi sahəsində qarşıya çıxan çətinliklər müzakirə olunub
Bakı, 24 fevral, AZƏRTAC
İqtisadiyyat Nazirliyi yanında Dövlət Vergi Xidməti (DVX) tərəfindən iqtisadiyyatın müxtəlif istiqamətləri üzrə sahibkarların vergi qanunvericiliyinin tətbiqi və inzibatçılığı sahəsində qarşılaşdıqları çətinliklərin aradan qaldırılması məqsədilə dialoq formatında görüşlər davam etdirilir.
AZƏRTAC Dövlət Vergi Xidmətinə istinadla xəbər verir ki, növbəti görüş onlayn formatda DVX-nin Vergi siyasəti Baş İdarəsi, Azərbaycan Qida Təhlükəsizliyi Agentliyi və Azərbaycan Quş Əti, Yumurta İstehsalçıları və İxracatçıları Assosiasiyası, həmçinin bu sahənin digər nümayəndələrinin iştirakı ilə təşkil edilib.
Dövlət başçısının 2022-ci il 22 iyul tarixli sərəncamı ilə təsdiq edilmiş “Azərbaycan Respublikasının 2022-2026-cı illərdə sosial-iqtisadi inkişaf Strategiyası"ndan irəli gələn vəzifələrin icrası ilə bağlı heyvandarlıq və quşçuluq sahələri üzrə inkişafın stimullaşdırılması üçün verilə biləcək vergi təşviqlərinin dairəsinin müəyyənləşdirilməsi məqsədi daşıyan görüşdə qeyd edilən təsərrüfatlarda istifadə olunan dərman və dərman preparatlarının ölkə daxilində satışına vergi güzəştlərinin tətbiqi məsələsi müzakirə olunub.
Bundan başqa, soya paxlasının və cecəsinin yerli istehsal hesabına təmin edilməsi məqsədilə güzəştlərin, o cümlədən bu məhsulların ƏDV-dən azad olunmasının sahənin inkişafına, heyvandarlıq və quşçuluq təsərrüfatlarına təsiri barədə fikir mübadiləsi aparılıb.
Sonda vergitutma mexanizmlərinin təkmilləşdirilməsi ilə bağlı sahibkarların rəy və təkliflərinin öyrənilməsi istiqamətində görüşlərin davam etdiriləcəyi iştirakçıların diqqətinə çatdırılıb.