Salyanda bu il pambıq sahələrində bol məhsul var VİDEO
Salyan, 28 avqust, İsmayıl Cəfərli, AZƏRTAC
Ötən təsərrüfat ili Salyan rayonunda pambıqçılıq üzrə uğurlu olub. Belə ki, ötən il 9285 hektar sahədə pambıq əkilib ki, bu sahələrdən 29 min 394 ton məhsul əldə edilərək tədarük məntəqələrinə təhvil verilib. Bu da orta hesabla 36.1 sentner məhsul deməkdir.
AZƏRTAC xəbər verir ki, builki təsərrüfat ilində də pambıq tarlalarında normal çıxış alınıb. Bu il su və digər çətinliklərlə üzləşməyən fermerlərin indi ayrı şikayəti var. 45 hektar ərazidə pambıq əkini aparan ağ qızıl ustası İbadət Cəfərov pambığın alış qiymətindən aşağı olmasından gileylənib: “Bu il şirkətlə müqavilə bağlamışam, 45 hektar sahədən 40 sentnerdən yuxarı məhsul gözlənilir. Çox da ola bilər. Ona görə ki, belə iqlim şəraiti pambıqçılıq üçün gözəl oldu. Pambığın kifayət qədər normal boyu, inkişafı var və artıq xeyli açılış var. Məhsul sentyabrın axırına qədər 80 faizdən çox açılacaq. Oktyabr ayında demək olar ki, əksər sahələrdə vaxtında əkilən pambığın yığımına son veriləcək”.
Salyanın Ərəbqardaşbəyli kənd sakini Ramil Qasımov ötən il 5 hektar ərazidə pambıq əkini aparıb. Məhsul bol olduğundan fermer bu il sahəni artıraraq 10 hektara çatdırıb. Bu il 35 sentner pambıq məhsulu götürəcəyini deyən pambıqçı da fermerə ayrılan kreditin baha olduğunu deyir.
Ramil Qasımov: “Hazırda son suvarma prosesi gedir. Ayın sonuna qədər suvarmanı da qurtaracağıq. Sentyabrın sonunda pambığın yığılma prosesi başlayacaq. Zavodla müqavilə bağlamışıq. 30-40 sentner pambıq götürmək ehtimalı var. Heç bir şeydən narazılığımız yoxdur. Subsidiya, azot, fosfor, güzəştli kredit götürmək mümkündür. Var olsun, dövlətimiz”.
Fermerlərin bu cür problemləri olsa da hazırda pambıq sahələrində suvarılma işləri aparılır. Əsas məqsəd sahələrdən bol məhsul götürmək və qazanc əldə etməkdir.
Salyan DAİM-nin direktor müavini İlham Bəşirov: “Rayonumuzda pambıqçılıq kənd təsərrüfatında əsas fəaliyyət növlərindən biridir. Bu il 1188 nəfər fermerimiz 8682 hektar sahədə pambıq əkib-becərib. Hazırda pambıq sahələrində son becərmə işləri aparılır. Bu yaxınlarda pambıq yığımı başlayacaq. Ona görə də rayonda olan pambıqyığan maşınlar və yığımda iştirak edəcək digər texnikalar təmir olunaraq saz vəziyyətə gətirilib. Fermerlərimiz pambığın 90 faizdən çoxunu maşınla yığmağı nəzərdə tutub. Sahələrdən bol məhsul gözlənilir”.
Onun sözlərinə görə, fermerlər 5 pambıqçılıq şirkəti ilə müqavilə imzalayıb. Fermerlər pambığın 90 faizini kombaynlarla yığacaqlarını nəzərdə tutublar. Salyan DAİM-in nümayəndəsi onu da bildirdi ki, mütəxəssislər mütəmadi olaraq fermerlərlə görüşlər keçirir.
Bölmənin digər xəbərləri
