Sankt-Peterburq 2020-ci ildə futbol üzrə Avropa çempionatının oyunlarını qəbul etməyə hazırdır
Bakı, 31 yanvar, AZƏRTAC
Sankt-Peterburq 2020-ci ildə keçiriləcək futbol üzrə Avropa çempionatının oyunlarını qəbul etməyə hazırdır.
AZƏRTAC TASS agentliyinə istinadla xəbər verir ki, bu barədə jurnalistlərə Rusiyanın idman naziri Pavel Kolobkov məlumat verib: “Bütün infrastruktur, o cümlədən müvəqqəti idman qurğuları hazırdır. Biz onları dünya çempionatından sonra saxlayırıq. Artıq bir neçə yoxlama səfərləri olub və UEFA-dan olan həmkarlarımız nəticələrdən razıdırlar”.
Turnirdən əvvəl şəhərdə azarkeş parkının təşkilinin planlaşdırıldığını vurğulayan nazir bildirib: “Fan zonalara cavabdehliyi Sankt-Peterburq hökuməti daşıyacaq. Bu dəfə də bir rəsmi fan-zona olacaq. Əminik ki, dünya çempionatında olduğu kimi, bu turnirdə də fan-zona populyarlıq qazanacaq”.
P.Kolobkov turnirdə Rusiya millisindən yüksək nəticə gözlədiyini söyləyib. O, bu turnirdən sonra UEFA Çempionlar Liqasının finalına ev sahibliyi etmək hüququnu qazanacaqlarına ümid etdiyini bildirib.
Avropa çempionatı 2020-ci il iyunun 12-dən iyulun 12-dək təşkil olunacaq. Turnirin 60 illik yubileyi münasibətilə çempionata Avropanın 12 ölkəsi ev sahibliyi edəcək.
Qitə birinciliyinin qrup mərhələsinin üç, dörddəbir finalın isə bir qarşılaşması Bakıda oynanılacaq. İyunun 13-də, 17-də və 21-də A qrupunun üç oyunu, iyulun 4-də isə dörddəbir final mərhələsinin bir görüşü 68,7 min azarkeş tutumuna malik Bakı Olimpiya Stadionunda keçiriləcək.
Bölmənin digər xəbərləri
