Bakı, 30 noyabr, Anar Rzayev, AZƏRTAC 

Azərbaycan ilə İsveç arasında yaxşı əlaqələr mövcuddur. Nazirlər səviyyəsində müntəzəm mübadiləmiz həyata keçirilir. Hər il biznes nümayəndələrimizin görüşləri olur. Bizim əlaqələrimizi daha da gücləndirmək üçün imkanlarımız var.

Bu sözləri AZƏRTAC-a məxsusi müsahibəsində İsveçin Azərbaycandakı səfiri xanım İnqrid Tersman deyib.

Ölkələrimiz arasında iqtisadi əlaqələrdən söhbət açan diplomat bildirib: “Azərbaycan bazarı İsveç şirkətləri üçün maraqlıdır. İKT sahəsində İsveçin yaxşı təcrübəsi var. Azərbaycan iqtisadiyyatın şaxələndirilməsi siyasətini həyata keçirir. Ölkəniz Avropa ilə Mərkəzi Asiya, Qafqaz, Türkiyə arasında, ümumiyyətlə, regionda körpü rolunu oynayır. Nəqliyyat sahəsində fəaliyyət göstərən İsveç şirkətləri daha geniş alternativ marşrutlardan istifadədə maraqlıdırlar. Bizim enerji sahəsində hər hansı problemin həllində təcrübəsi olan şirkətlərimiz var. Azərbaycan və İsveç şirkətləri, qanunverici orqanlarımız bu əlaqələri daha da irəliyə aparır”.

İsveçin Dini İcmalara Dəstək üzrə Dövlət Agentliyinin sədri Ake Qoranssonun rəhbərliyi ilə nümayəndə heyətinin Bakıya səfər etdiyini xatırladan İnqrid Tersman ölkəmizin dinlərarası dialoq və multikulturalizm sahələrində böyük təcrübəsinin olduğunu diqqətə çatdırıb.

Bakı-Tbilisi-Qars dəmir yolu barədə danışan səfir bu layihənin böyük uğur olduğunu bildirib: “Bu layihə Azərbaycan ilə Avropa arasında əlaqələri möhkəmləndirəcək. “Cənub Qaz Dəhlizi”, TAP layihələri Avropa İttifaqı tərəfindən tam dəstəklənir. Bu, Azərbaycan ilə enerji sahəsində güclü əməkdaşlıq deməkdir. Azərbaycan Avropa İttifaqı üçün önəmli tərəfdaşdır. Bu, əlaqələndirmənin başqa yoludur. Azərbaycan regionda, eləcə də Avropada güclü ölkəyə, tərəfdaşa çevrilir.

İsveçdə təhsilin faydalarından yararlanmağın əhəmiyyətindən danışan diplomat səfirliyin internet səhifəsində müntəzəm olaraq təqaüd proqramlarının yerləşdirildiyini vurğulayıb: “Magistratura və elmi işlə məşğul olan gənclər üçün “Visby” təqaüd proqramı mövcuddur. 2018-2019-cu ildə İsveçdə təhsildən yararlanmaq istəyən tələbələr üçün müraciət müddəti açıqdır. www.si.se  veb səhifəsində bir çox İsveç universitetlərinin təklif etdiyi təqaüd proqramlarını tapmaq mümkündür”.

Ermənistan-Azərbaycan, Dağlıq Qarabağ münaqişəsinə toxunan səfir İnqrid Tersman deyib ki, münaqişə siyasi yolla həll edilməlidir. İsveç 1990-cı illərdə ATƏT-in Minsk qrupunun təsis edilməsinin təşəbbüskarlarından biri olub. Biz danışıqlar formatını dəstəkləyirik. Bir müddət öncə Azərbaycan və Ermənistan prezidentlərinin Cenevrədə keçirilən görüşünü diqqətlə izlədik. Ümid edirəm ki, tərəflərin müsbət addımları ilə bu münaqişə həll ediləcək.