Səfir: Mədəni-humanitar əməkdaşlıq Azərbaycan və Qazaxıstan xalqlarını daha da yaxınlaşdırır
Bakı, 22 oktyabr, AZƏRTAC
Qazaxıstanla Azərbaycan arasında münasibətlər hazırda dinamik inkişaf edir və siyasətdən, iqtisadiyyatdan tutmuş nəqliyyat, logistika, kənd təsərrüfatı, təhsil, müdafiə və təhlükəsizlik məsələlərinədək geniş sahələri əhatə edir. Bununla yanaşı, qardaş xalqların daha da yaxınlaşmasına xidmət edən mədəni və humanitar əlaqələr ikitərəfli əməkdaşlığın möhkəmləndirilməsində xüsusi əhəmiyyət daşıyır.
Bunu Qazaxıstanın Azərbaycandakı səfiri Alim Bayel XII Bakı Beynəlxalq Kitab Sərgisi çərçivəsində AZƏRTAC-ın müxbiri ilə söhbətində deyib.
Diplomatın sözlərinə görə, Qazaxıstanla Azərbaycanı yalnız ortaq tarixi köklər və çoxəsrlik dostluq ənənələri deyil, həm də bütün sahələrdə strateji tərəfdaşlığı daha da möhkəmləndirmək istəyi birləşdirir.
“Səfir kimi məni ölkələrimiz arasında mədəni və humanitar əlaqələrin inkişafı xüsusilə sevindirir. Qazax və Azərbaycan xalqlarının qardaş xalqlar olduğunu tez-tez vurğulayırıq. Lakin tarixi və mənəvi qohumluğumuzu qeyd etməklə kifayətlənməməli, bir-birimizi daha yaxından tanımağa, xalqlarımızın zəngin mədəni irsi, tarixi, ədəbiyyatı və ənənələri ilə tanış olmağa da çalışmalıyıq”, – deyə o qeyd edib.
A.Bayel vurğulayıb ki, beynəlxalq kitab sərgiləri, ədəbi görüşlər və birgə nəşriyyat layihələri mədəni dialoqun genişləndirilməsində və iki ölkə arasında qarşılıqlı anlaşmanın möhkəmləndirilməsində mühüm rol oynayır.
“Bakı Beynəlxalq Kitab Sərgisi çərçivəsində Qazaxıstanla Azərbaycan arasında ədəbi əlaqələrin inkişafına töhfə verən tədbirlərin keçirilməsinə ürəkdən sevinirəm. Belə tədbirlərdən biri görkəmli qazax yazıçısı, ictimai və dövlət xadimi Abiş Kekilbayevə həsr olunmuş kitabın təqdimatı oldu. Nəşrin müəllifi Sauıtbek Abdraxmanov da tanınmış ictimai xadim, yazıçı və alimdir. Bu cür əsərlər sayəsində azərbaycanlı oxucular qazax xalqının görkəmli nümayəndələrini, onun tarixini və mənəvi dəyərlərini daha yaxından tanımaq imkanı əldə edirlər”, – deyə diplomat bildirib.
Səfir bu cür təşəbbüslərin milli ədəbiyyatın təbliğinə töhfə verməklə yanaşı, mədəni əməkdaşlığın möhkəmləndirilməsi və iki ölkənin xalqlarının yaxınlaşması üçün əlavə imkanlar yaratdığına əminliyini ifadə edib.
İkitərəfli münasibətlərin inkişafından danışan A.Bayel birgə strateji layihələrin həyata keçirilməsinin də vacibliyini qeyd edib. O, xüsusilə Qazaxıstan və Azərbaycan prezidentlərinin bu yaxınlarda Xəzər dənizinin dibi ilə çəkilmiş fiber-optik rabitə xəttinin açılışını etməsinə diqqət çəkib.
Onun sözlərinə görə, bu genişmiqyaslı infrastruktur layihəsi rəqəmsal rabitənin inkişafı və hər iki dövlətin Avrasiyanın mühüm kommunikasiya qovşaqları kimi mövqelərinin möhkəmləndirilməsi üçün yeni perspektivlər açır.
Bölmənin digər xəbərləri
