SƏHİYYƏ NAZİRİ OQTAY ŞİRƏLİYEVİN ÇIXIŞI
Hörmətli müşavirə iştirakçıları!
Ümummilli lider Heydər Əliyevin adı ilə bağlı hər bir dövlət əhəmiyyətli proqram, layihə ölkə, xalq üçün ən önəmli sahələr üzrə istiqamətləndirilmişdir. Bu ənənə indi möhtərəm cənab Prezident İlham Əliyev tərəfindən də uğurla davam etdirilir.
Məhz bu gün müzakirə olunan proqram Bakının ətraf qəsəbələri əhalisinin sosial problemlərinin həllinə, rifahının yüksəldilməsinə imkan verən bir proqramdır. Qəsəbələrin ölkə paytaxtının ətrafında yerləşməsinə baxmayaraq, onların bir sıra problemləri, o cümlədən səhiyyə sahəsində də lazımi səviyyədə həll olunmalıdır. Qəsəbələrdə yerləşən stasionarların çarpayı fondu 2500-ə qədərdir və bu da şəhər üzrə olan göstəricilərdən xeyli aşağıdır. Lakin buna baxmayaraq, bu çarpayılardan ancaq 25-30 faiz istifadə olunur. Buna səbəb, tibb müəssisələrinin istiliklə, dərman preparatları, ərzaq məhsulları ilə lazımi səviyyədə təmin edilməməsidir.
Başqa bir problem kadr problemidir. Şəhərin özündə vakant iş yerinin olmamasına baxmayaraq, qəsəbələrin tibb müəssisələrində həkimlərlə komplektləşdirmə hazırda 75 faizdir, 250 həkim çatışmır. Lazımi diaqnostik imkanların olmadığına görə əhali sadə laborator müayinələrdən keçmək üçün 30-35 kilometr məsafə qət etməlidir. Bu da onların haqlı narazılıqlarına səbəb olur.
Son 10 ildə təmir olunmuş 3 səhiyyə müəssisəsindən savayı, Bakının ətraf qəsəbələrində yerləşən tibb idarələrinin heç birində əsaslı təmir işləri aparılmamışdır. Həmin 3 səhiyyə müəssisəsində təmir isə Heydər Əliyev Fondunun və başqa qurumların köməyi ilə reallaşmışdır. Digər tibb müəssisələrinin təmiri üçün büdcədən ayrılan vəsait yalnız cari təmir işlərinə çatır. Aparılmış təmir işləri isə heç bir müasir standartlara cavab vermir.
Büdcə vəsaitlərinin ayrı-ayrı rayon və tibb müəssisələri arasında xırda hissələrə bölünməsi, əhaliyə keyfiyyətli tibbi yardımın göstərilməsinə imkan vermir. Məsələn, Binəqədi rayonunun 5 qəsəbəsində fəaliyyət göstərən 13 tibb müəssisəsindən hərəsinə hər il cari təmir işləri üçün cəmi 19 milyon manat və ya 4 min ABŞ dolları ayrılırdı. Tibbi avadanlığın və inventarın alınması üçün isə hər bir müəssisəyə ildə 15 milyon manat, yəni 3 min ABŞ dolları vəsait ayrılırdı. Digər rayonlarda da büdcə vəsaitinin bölünməsi eyni vəziyyətdədir. Aydındır ki, belə şəraitdə tibb müəssisələrinə ayrılan dövlət vəsaiti səpələnərək, səhiyyə sahəsində əsaslı işlərin görülməsinə imkan vermir.
Məhz bu baxımdan, cənab Prezidentin Bakı şəhərinin rayon səhiyyə şöbələrinin ləğvi barədə 2006-cı il 23 fevral tarixli Sərəncamı paytaxt səhiyyəsinin inkişafı üçün atılan mühüm addımdır. Sərəncamla bağlı görüləcək işlər tibb müəssisələri şəbəkəsinin təkmilləşdirilməsinə, büdcə vəsaitlərinin qənaətinə və səmərəli istifadəsinə, kadr potensialından və texniki potensialdan istifadə əmsalının artırılmasına imkan verəcəkdir.
Bu gün qəbul olunan proqram ətraf qəsəbələrin əhalisinin həyat və fəaliyyətinin bütün sahələrinə, ilk növbədə, səhiyyənin inkişafına güclü təkan verəcəkdir. Proqramda 25 tibb müəssisəsinin tikintisi, yenidən qurulması və təmiri nəzərdə tutulmuşdur. Qeyd etmək lazımdır ki, 25 tibb müəssisəsindən 16-sı yeni tikiləcək obyekt olacaqdır. Bu sahədə proqram hələ rəsmən təsdiq olunmamış, işlərə başlanılmışdır. Belə ki, Zabrat qəsəbəsi əhalisinin müraciəti nəzərə alınaraq, 25 çarpayılıq xəstəxananın tikintisinə başlanılıb və onun təməlqoyma mərasimində Azərbaycan Prezidenti cənab İlham Əliyev şəxsən iştirak etmişdir. Xəstəxananın tikintisi və təchizatının bu ilin sonuna qədər başa çatdırılması və qəsəbə sakinlərinin istifadəsinə verilməsi nəzərdə tutulmuşdur.
Əzizbəyov rayonunun Şüvəlan qəsəbəsində yerləşən 31 nömrəli birləşmiş şəhər xəstəxanasının əsaslı təmirinə başlanılmışdır. Yeni tibb avadanlıqları ilə təchizat daxil olmaqla, yenidənqurma işlərinin bu ilin may ayında başa çatdırılması nəzərdə tutulmuşdur. İstifadəyə verilən yeni tikilmiş, habelə yenidən qurulmuş obyektlər inkişaf etmiş ölkələrin modelinə uyğun olaraq, sağlamlıq mərkəzləri kimi fəaliyyət göstərəcəkdir. Onlar bütün diaqnostik avadanlıqla, müxtəlif xəstəliklərin müalicəsi üçün bütün vasitələrlə təchiz olunacaqdır. Yeni obyektlər istifadəyə verildikcə, Bakının istirahət zonalarında fəaliyyət göstərən köhnə tibb müəssisələrinin profili xroniki xəstələrin müalicəsi üçün stasionar və sanatoriyalara uyğunlaşdırılacaqdır.
Möhtərəm cənab Prezident, Sizi əmin edirəm ki, müstəqil respublikamızda səhiyyə sahəsində aparılan islahatlar, o cümlədən bu gün qəbul olunmuş proqramın icrası Bakı şəhərində uğurla həyata keçiriləcəkdir.
Diqqətinizə görə minnətdaram.
Bölmənin digər xəbərləri
