Səkkiz min sürücü təlimlərə cəlb edilir
Bakı, 27 yanvar, AZƏRTAC
Rəqəmsal İnkişaf və Nəqliyyat Nazirliyinin tabeliyində fəaliyyət göstərən Azərbaycan Yerüstü Nəqliyyat Agentliyinin (AYNA) Təlim-Tədris Mərkəzi beynəlxalq sərnişin və yük daşımalarını həyata keçirən sürücülərin hazırlığı ilə bağlı 13 şəhər və rayonda təlimlər təşkil edəcək.
Nazirlikdən AZƏRTAC-a bildirilib ki, təlimləri mərkəzin əməkdaşları müvafiq tədris proqramları əsasında paytaxt Bakı, həmçinin Qazax, Mingəçevir, Bərdə, İmişli, Şirvan, Lənkəran, Zaqatala, Şəki, Qəbələ, Şamaxı, Göyçay və Ağdaşda keçəcəklər.
Azərbaycan Respublikası Nazirlər Kabinetinin “Avtomobil nəqliyyatı ilə beynəlxalq sərnişin və yük daşımalarına buraxılış Qaydaları”nda beynəlxalq daşımalarda iştirak edən sürücülərin hazırlıq səviyyəsinə dair tələblər müəyyən edilib. Tələblərə əsasən, sürücülərin peşəkarlıq səriştəsinə dair hazırlığı və yenidən hazırlığı vacib şərtdir.
Hazırlıq zamanı sürücülərə avtomobil nəqliyyatı ilə beynəlxalq sərnişin və yük daşımalarının təşkilinin özünəməxsusluğu, bu sahədə mövcud olan hüquq normaları, işgüzar adətlər, beynəlxalq daşımalarda istifadə olunan nəqliyyat vasitələrinin istismarına dair tələblər və onların istismar xüsusiyyətləri, habelə ilk tibbi yardımın göstərilməsi haqqında məlumat verilir. Məşğələlərdə avtomobil nəqliyyatı ilə beynəlxalq daşımalar yerinə yetirən sürücülər yüklərin qəbulu, rəsmiləşdirilməsi, daşınması və təhvil verilməsi qaydaları, müxtəlif növ yüklərin daşınmasının şərtləri və xüsusiyyətləri, habelə avtomobil nəqliyyatı ilə beynəlxalq sərnişin və yük daşımalarını tənzimləyən normativ hüquqi aktlar barədə məlumatlandırılırlar. Təlimlər Nazirlər Kabinetinin təsdiqlədiyi tədris proqramı əsasında yüksəkixtisaslı, təcrübəli müəllim heyəti və təlim ustaları cəlb olunmaqla aparılır. Yekunda imtahanlar Bakıda olduğu kimi, regionlarda da elektron qaydada keçiriləcək.
Bu günədək təlimlərdə 3 mindən çox sürücü iştirak edib. Ümumilikdə 8 min sürücünün təlimlərə cəlb edilməsi nəzərdə tutulur. Sürücülərin peşəkarlıq səriştəsinə dair hazırlığa başlamayan daşıyıcılar 2023-cü il aprelin 8-dən etibarən beynəlxalq yük daşımalarında iştirak edə bilməyəcəklər. Təlimlərdə iştirak etmək istəyən sürücülər Bakı şəhəri, Ziya Bünyadov prospekti, 39C ünvanında yerləşən Təlim-Tədris Mərkəzinə, həmçinin AYNA-nın “1181” Çağrı mərkəzinə müraciət edə bilərlər.
Bölmənin digər xəbərləri
