SOCAR AQŞ-nin təşəbbüsü və təşkilatçılığı ilə Respublika Gününə həsr olunmuş vebinar keçirilib
Bakı, 29 may, AZƏRTAC
Azərbaycan Xalq Cümhuriyyətinin yaranmasının 102-ci ildönümü münasibətilə neftçilər, ziyalılar, deputatlar, səfirlər və istedadlı gənclər bir araya gəliblər.
Şirkətdən AZƏRTAC-a bildirilib ki, mayın 28-də SOCAR AQŞ-nin təşəbbüsü və iştirakçılığı ilə “Qürur mənbəyimiz olan Azərbaycan Xalq Cümhuriyyəti: 102-ci yubileyin mübarək!” adlı vebinar təşkil olunub. İlk olaraq, virtual tədbir iştirakçıları Azərbaycan Respublikasının dövlət himnini ifa ediblər. Tədbir iştirakçılarını salamlayan SOCAR AQŞ-nin baş direktoru Ramin İsayev bildirdi ki, COVID-19 pandemiya dövründə SOCAR AQŞ mütərəqqi virtual ofis sistemləri vasitəsilə dənizdə, quruda, istehsalat sahələrində çalışan, evdə olan bütün əməkdaşlarını və cəmiyyətimizin tanınmış ziyalılarını bir araya gətirərək Respublika Gününü qeyd edir: “Şərqdə ilk demokratik respublika olan Azərbaycan Xalq Cümhuriyyətinin yaranması tarixi bir hadisə idi və milli dövlətçilik şüurumuzun zənginliyinin və gücünün təntənəsi idi. Azərbaycanın dahi fikir adamları XIX əsrdə və XX əsrin əvvəlində fədakarlıqla çalışaraq Azərbaycan Xalq Cümhuriyyətinin ideoloji əsaslarını işləyib hazırladılar və nəticədə 1918-ci ilin 28 may tarixində demokratik respublikamızın qurulmasına nail oldular. Bu şanlı tarix xalqımızın müstəqillik hisslərini daha da gücləndirərək onun heç vaxt işğalla barışmayacağına ciddi zəmin yaratdı. Bu gün gənc nəslin Respublika Gününü xüsusi coşğu ilə qeyd etməsi hər birimizdə iftixar hissi doğurur və dövlət müstəqilliyimizin əbədi olacağına əminlik yaradır!’’.
Vebinarda Azərbaycan Respublikası Milli Məclisinin deputatları Qənirə Paşayeva, Məlahət İbrahimqızı, Hikmət Babaoğlu, Sabir Rüstəmxanlı və Anar İsgəndərov panel müzakirəsində çıxış edərək Azərbaycan Demokratik Respublikasının qət etdiyi şanlı tarixdən geniş söhbət açdılar.
Deputat M.İbrahimqızı çıxış edərək bildirdi ki, Cümhuriyyət banilərinin apardığı xarici siyasət sayəsində Paris Sülh konfransının iştirakçı dövlətləri Azərbaycanın müstəqilliyini tanımağa məcbur oldu: “Beynəlxalq ictimaiyyət tərəfindən müstəqil dövlət kimi tanınmağımız sonradan Azərbaycanın SSRİ-nin tərkibində respublika kimi mövcud olmasına da şərait yaratdı. Əks təqdirdə, biz bu gün Rusiya Federasiyasının Başqırdıstan, Tatarıstan kimi muxtar subyektlərindən biri idik”.
Millət vəkili Q.Paşayeva çıxış edərək Cümhuriyyət liderlərinin fədakarlığı, siyasi iradəsi və vətənpərvərliyi ilə ərsəyə gələn tarixi uğurlardan geniş söhbət açdı: “Bu gün bizdən çox şey asılıdır: biz özümüz tariximizi necə bilirik və onu gənc nəslə necə öyrədirik. Hər bir AXC liderinin həyat və fəaliyyəti dərindən öyrənilməli və şövqlə aşılanmalıdır. Mən Cümhuriyyət bağının yaradılması təklifi ilə tez-tez çıxış edirəm. Əminəm ki, belə bir bağ xalqımız üçün müqəddəs yerlərdən birinə çevriləcəkdir!”.
Daha sonra çıxış edən görkəmli ziyalımız S.Rüstəmxanlı 1991-ci ildə Dövlət Müstəqilliyi Aktının qəbul olunmasının lehinə səs verən deputatlardan biri olduğundan qurur duyduğunu və bu gün dinamik inkişaf edən müstəqil Azərbaycanda yaşamağından çox xoşbəxt olduğunu bildirdi: “AXC-nin bərqərar etdiyi demokratik dəyərlər sistemi, dövlət quruculuğu ənənəsi bütün türk-müsəlman dünyasına verilən böyük töhfədir. Bu şərəfli tarixi bizlərə yaşatdığına görə Cümhuriyyət banilərinə sonsuz ehtiramımızı hər an sərgiləməliyik!”.
AXC tarixini araşdıran tədqiqatçı, tarix elmləri doktoru, professor, millət vəkili A.İsgəndərov geniş təqdimatla çıxış edərək bir çox maraqlı faktları tədbir iştirakçıları ilə bölüşdü: “Cəmi 23 ay ömür sürən AXC tariximizə onlarla ilklər bəxş etdi. İstiqlal Bəyannaməsı siyasi sənəd kimi neçə millətlərə nümunə oldu, 11 fraksiyadan ibarət parlamentdə milli azlıqlara iştirak hüququ verildi, qadınlara seçki hüququ verildi, hər bir vətəndaşa milli sərvətlərdən istifadə təminatı verildi, ictimai xidmətlər hər kəs üçün əlçatan oldu!’’.
Millət vəkili H.Babaoğlu çıxış edərək bildirdi: “Prezident İlham Əliyevin qeyd etdiyi kimi Azərbaycanın zəngin dövlət quruculuğu ənənəsi var. Xalq Cümhuriyyətinin siyasi varisi olaraq, 23 ayda yarımçıq qalmış ideyaları bu gün müstəqil Azərbaycan dövləti uğurla həyata keçirməkdədir”.
Daha sonra çıxış edən Türkiyə Respublikasının Azərbaycandakı səlahiyyətli və fövqəladə səfiri cənab Erkan Özoral və Türk Dövlətlərinin Parlamentlər Birliyinin Xarici Əlaqələr üzrə Baş koordinatoru, Türkiyənin Azərbaycandakı keçmiş səfiri Hülusi Kılıc Azərbaycan xalqını Cümhuriyyət günü münasibətilə təbrik edərək bir millət, iki dövlət devizinin önəmindən irəli gələn əzəli və əbədi qardaşlıqdan danışdılar.
Vebinarın 2-ci hissəsində şanlı tariximizin gənc nəslə aşılanması istiqamətində aparılan işlərdən söhbət açıldı. Budəfəki tədbirə qoşulan Ankara Ali Kuşçu adına ibtidai məktəbinin 3-cü sinif şagirdləri dahi Azərbaycan şairləri Səməd Vurğunun və Məmməd Arazın şeirlərindən ibarət maraqlı kompozisiya ilə çıxış edərək Azərbaycan xalqını bayram münasibətilə təbrik etdilər. Tədbirdə həmçinin SOCAR AQŞ-də çalışan işçilərin övladları arasında keçirilən “Şanlı Cümhuriyyətim mənim!” adlı rəsm müsabiqəsinin qaliblərinin əl işlərinin virtual nümayişi keçirildi.
Tədbirin sonunda yekun nitqi söyləyən baş direktor R.İsayev bildirdi ki, bugünkü təqdimatlar sübut edir ki, 28 may tarixi doğrudan da bütün bayramlarımızın zirvəsində yer alan qəhrəmanlıq salnaməsidir və İnsanlara Hürriyyət, Millətlərə İstiqlal maarifçi-insanpərvər dünyagörüşü ilə millətimizi inkişafa doğru aparır. Biz əminik ki, “Bir daha yüksələn bayraq bir daha enməyəcəkdir!”.
Bölmənin digər xəbərləri
