CƏMİYYƏT
Son 6 ayda COVID-19 infeksiyasından ana ölümü halları qeydə alınmayıb
Bakı, 3 mart, AZƏRTAC
Səhiyyə Nazirliyinin mütəxəssis-eksperti, həkim-ginekoloq Şəymən Qədimova hamiləlik, yeni növ koronavirusa yoluxan anaların körpəni qidalandırması, müalicəsi ilə əlaqədar sualları cavablandırıb. AZƏRTAC həmin müsahibəni təqdim edir.
- Şəymən xanım, hamilələr arasında daha çox təsadüf olunan xəstəliklər hansılardır?
- Statistikaya əsasən, respublikamızda trombemboliya ana ölümünün əsas səbəbi kimi göstərilir. Bir çox ekstragenital xəstəliklər – şəkərli diabet, müxtəlif mənşəli ürək qüsurları, ağciyər vərəmi, qaraciyər xəstəlikləri (virus hepatitləri), anadangəlmə və qazanılmış tromboflebiyalar (qanın laxtalanma faktor pozulmaları) ana ölümünün səbəbləri hesab olunur.
- Riskli hamiləlik haqqında məlumat verə bilərsiniz?
- Somatik, sağlam olmayan qadınlar hamiləlik üçün yüksək risk qrupunu təşkil edir. Yüksək risk qrupuna daxil olan qadınlar hamiləliyi axıra qədər çatdıra bilmir və hamiləliyin ana və döl üçün nəticələri qənaətbəxş olmur. Riskli hamiləlik nəinki dölün, eləcə də ananın ölümünə səbəb olur.
Hamilələr üçün yüksək risk qrupunu təşkil edən patologiyalara hamiləlik zamanı hipertenziv vəziyyətlər və preklampsiya, ekstragenital xəstəliklər, fetoplasentar çatışmazlıq aiddir. Onu da qeyd etmək istəyirəm ki, riskli hamiləlik vaxtında aşkar edilib, qarşısı alınmasa, bu ya dölün bətndaxili ölümünə, ya da xəstə uşağın doğulmasına səbəb olur.
- Hamilə qadınlar koronavirusa qarşı vaksinasiya oluna bilərlər?
- Dünya praktikasında hamiləlik və südvermə dövründə, hətta hamiləlik planlaşdıran qadınlara peyvənd tövsiyə edilmir. Lakin geniş yayılmış epidemiya və pandemiyalar dövründə virusla mübarizə aparmaq məqsədilə istisnasız olaraq, kütləvi peyvəndlənmə aparılır. Virusun yeni növlərinin yoluxuculuğunun artdığı və virus tamamilə aradan qalxmadığı halda hamilə qadınlar da kütləvi peyvənlənməyə cəlb oluna bilərlər.
- Hansı xəstəliyi olan qadınlar süd verə bilməz?
- Bəzi istisnalar olmaqla bütün körpələrin ana südü ilə qidalanmasının vacibliyi elmi tədqiqatlarla təsdiqlənib. Hətta aktiv koronavirusa yoluxan hamilə qadınların dünyaya gətirdiyi körpələr də ana südü ilə qidalanmalıdır, çünki bu cür infeksiyalar əsasən südlə yox, qanla anadan dölə keçir. İnsanın immunçatışmazlığı virusu (İİV), kavernoz vərəm (açıq vərəm) istisna olmaqla bütün qadınlar süd verməlidir.
- Ölkədə koronavirusa yoluxan qadınların müalicəsi necə təşkil olunub?
- COVID-19 pandemiyasının ilk günlərindən etibarən virusa yoluxan hamilə qadınlara respublikamızın iki böyük klinikası - Kliniki Tibbi Mərkəz və Tibb Universitetinin Tədris Cərrahiyyə Klinikası xidmət göstərir. Sevindirici haldır ki, son 6 ayda COVID-19 infeksiyasından ana ölümü halları qeydə alınmayıb.
COVID-19-a yoluxması təsdiqlənən bütün hamilə qadınlar həmin klinikalara göndərilir. Ona görə də statistika respublika üzrə hesab olunur.
- Ana bətnində həyata keçirilən əməliyyatlar hansılardır? Hansı hallarda fetal cərrahiyyələr aparılır?
- Son illər ölkəmizdə bətndaxili qanköçürmə əməliyyatı icra edilməsində mühüm addımlar atılır. Belə ki, göstərilən patologiyaları müəyyən etmək üçün amniosentez (ana bətnində dölyanı mayenin müayinəsi) və kordosentez (ana bətnində dölün göbək ciyəsindən götürülən qanın müayinəsi) əməliyyatları uğurla həyata keçirilir.
Amniosentez əməliyyatı ambulator şəraitdə ultrasəs müayinəsi nəzarəti altında yerli ağrısızlaşdırma ilə aparılır. 2-3 həftədən sonra əldə olunan nəticəyə əsasən dölün bətndaxili sağlamlığı qiymətləndirilir. Həmin müayinənin 7-8 ildir ki, ölkəmizdə aparılması bir çox ciddi xəstə dölün bətndaxili aşkara çıxarılmasına kömək edir.
Kordosentez zamanı isə dölün göbək damarından qan götürməklə diaqnostik əhəmiyyət kəsb edən məlumatlar əldə edilir.