Soydaşlarımızın Gürcüstanda siyasi proseslərə təsiri ŞƏRH
Bakı, 28 oktyabr, AZƏRTAC
Gürcüstandakı soydaşlarımız Azərbaycan dövlətinin və Prezidentinin regional siyasətini dəstəkləyərək Azərbaycan-Gürcüstan münasibətlərinin möhkəmlənməsinə və inkişafına yönəlmiş siyasətə dəstək verdilər. Bu dəstək yalnız Azərbaycan-Gürcüstan münasibətlərinə töhfə vermək deyil, həm də Gürcüstanın siyasi həyatına fəal və prinsipial mövqe ilə qatılmaq anlamına gəlir.
Bunu AZƏRTAC-a açıqlamasında siyasi şərhçi Nicat İsmayılov söyləyib.
Gürcüstan əhalisinin əhəmiyyətli bir hissəsini təşkil edən 300 min azərbaycanlının seçki prosesində mühüm rol oynadığını vurğulayan siyasi şərhçi əlavə edib: “Onların yaşadığı bütün regionlarda səsvermə faizi yüksək olub, bu da soydaşlarımızın ölkədə baş verən proseslərə böyük maraq göstərdiyini və aktiv vətəndaş mövqeyi sərgilədiyini göstərir. Azərbaycanlı seçicilərin səsləri hakim partiyanın ümumi səslərinin formalaşmasında 7-8 faizlik paya sahibdir. Bu isə azərbaycanlıların Gürcüstanın siyasi arenasında vacib və hətta həlledici bir qüvvəyə çevrildiyini sübut edir. Bu dəstək, eyni zamanda, soydaşlarımızın ölkənin gələcəyinə olan töhfəsinin və öz təsir imkanlarının genişliyini göstərir”.
Nicat İsmayılov qeyd edib ki, parlament seçkilərinin nəticələri, Qərbin Gürcüstanda həyata keçirdiyi siyasətə və regionda ayrıcı xətlər yaratmağa yönələn səylərinə böyük zərbə vurdu. Gürcüstanda sülh və sabitlik tərəfdarı olan azərbaycanlılar və digər vətəndaşlar ənənəvi dəyərlərə sadiq qalaraq, Qərbin regionu parçalamaq və yeni müharibə ocağına çevirmək niyyətlərinə qarşı çıxdılar. Bu, Gürcüstandakı soydaşlarımızın təkcə milli maraqların müdafiəsi ilə məhdudlaşmayan, həm də bütün regionun sabitliyinə yönələn prinsiplərə bağlılığını göstərir.
Siyasi şərhçinin sözlərinə görə, Azərbaycan-Gürcüstan birliyi tarixi bir reallıq kimi regionun sabitliyinin əsas amillərindən biridir. Bu birlik tarixən hər iki dövlətin güclənməsinə və öz maraqlarını effektiv şəkildə müdafiə etməsinə imkan yaradıb. Azərbaycan və Gürcüstanın Ermənistanın regiondakı siyasətinə qarşı ortaq mövqedən çıxış etməsi və seçki prosesində göstərilən mövqe bu birliyin davam etdiyini bir daha təsdiqləyir. Seçkilərin nəticələri başqa cür olsaydı, Qərbin dəstəklədiyi namizədlər vasitəsilə Gürcüstanda və regionda yeni bir cəbhə açmaq və bölgəni xarici qüvvələrin təsiri altına almaq siyasəti həyata keçirilə bilərdi. Lakin, bu ssenarinin qarşısı alındı və Gürcüstan öz milli maraqlarını qorumağa davam edir.
“Azərbaycanlı seçicilərin dəstəyi ilə hakim partiya qalib gəldi və ümid edirəm ki, Gürcüstan hakimiyyəti bundan sonra azərbaycanlıların problemləri ilə daha yaxından maraqlanacaq. Gürcüstanda yaşayan azərbaycanlıların hüquqlarının qorunması, onların sosial-iqtisadi vəziyyətinin yaxşılaşdırılması və təhsil, mədəniyyət sahələrindəki ehtiyaclarının ödənilməsi istiqamətində real addımlar atılmalıdır. Bu, həm Gürcüstanın daxili siyasətinə, həm də Azərbaycanla əlaqələrin daha da güclənməsinə müsbət təsir göstərəcək.
Ermənistana gəldikdə isə, ümid edirik ki, bu ölkə də regionun bir parçası olduğunu anlayacaq və qonşu ölkələrlə qarşıdurma deyil, əməkdaşlıq siyasəti yürütməyə başlayacaq. Bu, regionda uzunmüddətli sülhün və sabitliyin bərqərar olunmasına töhfə verəcək və Qafqazın gələcək inkişafına daha əlverişli şərait yaradacaq.
Nəticə etibarilə, Gürcüstanda baş verən siyasi proseslərdə azərbaycanlıların fəal iştirakı həm regionun sabitliyinə, həm də Azərbaycan-Gürcüstan münasibətlərinin inkişafına mühüm töhfə verdi. Soydaşlarımızın ənənəvi dəyərlərə sadiq qalaraq, sülh və sabitlik naminə müdrik seçim etməsi Gürcüstanın və Azərbaycanın ortaq maraqlarının müdafiəsində vacib rol oynadı”, - deyə Nicat İsmayılov vurğulayıb.
Bölmənin digər xəbərləri
