REGİONLAR
Soyqırımları törətmək, terror və işğalçılıq Ermənistanın dövlət siyasətinin əsasını təşkil edir
Gəncə, 26 fevral, Elcan Məmmədov, AZƏRTAC
Tarixin müxtəlif dövrlərində erməni millətçi-şovinistlərinin soyqırımına məruz qalan xalqımız 1992-ci ilin qarlı qışında növbəti dəfə Xocalıda tarixin ağır sınağı ilə üzləşdi. Xocalı qətliamı Azərbaycan tarixinə ən dəhşətli və faciəli səhifələrdən biri kimi daxil oldu. XX əsrin ən qəddarcasına törədilən faciələrindən olan Xocalı faciəsi əvvəlcədən hazırlanan plan əsasında həyata keçirilib. Bu planın qurbanları olan dinc insanlar isə qəddarcasına qətlə yetirilib, əsir-girov götürülüb, yurd yerlərindən qovulub.
Bu fikirləri AZƏRTAC-ın bölgə müxbirinə müsahibəsində Dövlət Aqrar Universitetinin İctimai elmlər və multikulturalizm kafedrasının müdiri, professor Azad Bayramov deyib.
O bildirib ki, qüvvələr nisbəti qeyri-bərabər olan döyüşlərdən sonra Xocalıda olan özünümüdafiə qüvvələri son nəfərinə qədər vuruşaraq düşmənə çox ciddi müqavimət göstərib. Bunun özü də o dövrdə şəhəri müdafiə edən insanların göstərdiyi ən böyük qəhrəmanlıq nümunəsi idi.
“1992-ci il fevralın 25-dən 26-na keçən gecə Ermənistan silahlı qüvvələri Xankəndidə yerləşən keçmiş SSRİ-nin 366-cı motoatıcı alayının iştirakı ilə Xocalını mühasirəyə aldı. Ermənilər ən müasir silahlarla şəhərə hücum edərək Xocalı şəhərini yerlə-yeksan etdilər. Çoxsaylı ağır texnika ilə şəhər tamamilə dağıdıldı, yandırıldı və insanlar xüsusi qəddarlıqla qətlə yetirildilər. Onların içərisində başları kəsilən, gözləri çıxarılan, dərisi soyulan, diri-diri yandırılanlar çoxluq təşkil edirdi”, - deyə professor bildirib.
O qeyd edib ki, Xocalı soyqırımı zamanı 613 nəfər öldürüldü, 8 ailə tamamilə məhv edildi, 25 uşaq hər iki valideynini, 130 nəfər valideynlərindən birini itirdi. 1275 nəfər dinc sakin isə erməni vandalları tərəfindən əsir götürüldü. Bütün bunlar ermənilər tərəfindən xüsusi amansızlıqla və ağlasığmaz vəhşiliklə həyata keçirilib. Bu qətliam insanlığa, bütünlükdə bəşəriyyətə qarşı cinayət idi.
A.Bayramov xüsusi qəddarlıqla həyata keçirilən Xocalı soyqırımının törədilməsi zamanı ermənilərin Azərbaycanın bu qədim yaşayış məskəninin yer üzündən silinməsini qarşıya məqsəd kimi qoyduğunu deyib: “Xocalı Azərbaycanın qədim dövrlərinə aid ərazilərdən biri kimi tarix və mədəniyyət abidələrinin çoxluğu ilə seçilirdi. Ümumiyyətlə, beynəlxalq hüquqa görə qatı cinayət hesab olunan, sülh və bəşəri dəyərlərə zərbə olan soyqırımları, terror, işğalçılıq Ermənistanın dövlət siyasətinin əsasını təşkil edir. Artıq təsdiqlənmiş faktdır ki, Xocalı soyqırımı da daxil olmaqla, erməni millətçilərinin Azərbaycana qarşı yönəltdiyi, 2 əsrdən artıq davam edən işğalçılıq əməllərinin bir adı var - etnik təmizləmə, deportasiya, insanlığa qarşı bəşəri cinayət adlandırılan soyqırımı siyasəti!”.
O bildirib ki, Xocalı soyqırımına ilk siyasi qiymət ulu öndər Heydər Əliyev tərəfindən verilib. Ümummilli Lider daha bir tarixi missiyanı yerinə yetirərək, erməni şovinizminin cinayətlərini dünyaya açıqlayıb.
Azərbaycan Respublikasının Prezidenti İlham Əliyevin səriştəsi, dövlətimizin artan nüfuzu, uğurlu diplomatiya sayəsində dünya ictimaiyyəti başa düşür ki, Ermənistan dövlətinin siyasətində terrorçuluq və işğalçılıq ideologiyaya çevrilib. Hazırda Xocalı soyqırımı bir sıra ölkələr tərəfindən tanınıb və faciəyə beynəlxalq siyasi qiymət verilib.
“Ermənistanın daim mülki əhalini hədəf seçən təxribatlarına və hərbi təcavüzünə cavab olaraq, 2020-ci il sentyabrın 27-də Azərbaycan xalqı əzəli torpaqlarının işğaldan qurtarılması, BMT Təhlükəsizlik Şurasının qətnamələrinin tələblərinin yerinə yetirilməsi və tarixi ədalətin bərpa edilməsi uğrunda Vətən müharibəsinə qalxdı. 44 gün sürən döyüşlər nəticəsində rəşadətli Azərbaycan Ordusu parlaq Qələbə qazanaraq doğma torpaqlarımızı işğaldan azad etdi. Bu haqq döyüşündə məhv edilən düşmən qüvvələri içərisində Xocalı soyqırımının cəlladları da vardı”, - deyə o əlavə edib.