STRASBURQDAKI “AZƏRBAYCAN EVİ”NDƏ TANINMIŞ TÜRKOLOQ ALİM İREN MƏLİKOFFUN 90 İLLİYİ QEYD EDİLMİŞDİR
AZƏRTAC-ın xüsusi müxbiri xəbər verir ki, Strasburqda fəaliyyət göstərən “Azərbaycan evi” cəmiyyətində tanınmış türkoloq alim, soydaşımız İren Məlikoffun anadan olmasının 90 illiyi qeyd edilmişdir.
Tədbirdə Strasburqda və ətraf şəhərlərdə yaşayan azərbaycanlılar və müxtəlif ali məktəblərdə təhsil alan tələbələrimiz iştirak etmişlər.
“Azərbaycan evi” cəmiyyətinin sədri Mustafa Alınca vaxtilə ona dərs demiş İren xanım Məlikoffu iştirakçılara təqdim etmiş, Sovetlər Birliyi dövründə bütün qəlbi ilə bağlı olduğu doğma Vətəni Azərbaycanı uzaq Fransada tanıtmaq sahəsində gördüyü işlərdən danışmışdır. İren Məlikoffun 1984-cü ildə Strasburqun Mark Blok Universitetində Azərbaycan ədəbiyyatı və mədəniyyəti ilə bağlı konfransların keçirilməsində, sərgilər və konsertlərin təşkil edilməsində xidmətləri xatırladılmış, xalq artistləri Lütfiyar İmanovun, Habil Əliyevin və digər incəsənət ustalarının Fransaya səfərlərini təşkil etməsindən söhbət açılmış, Bakı Dövlət, Konyadakı Səlcuq və digər universitetlərin fəxri doktoru adına layiq görüldüyü, Fransanın, Azərbaycanın və Türkiyənin orden və medalları ilə təltif olunduğu qeyd edilmişdir.
Tədbirdə Mark Blok Universitetinin müəllimi kimi İren xanımın uzun illər bu təhsil ocağının türkologiya departamentinə rəhbərlik etdiyi, onlarla monoqrafiya və caysız-hesabsız elmi məqalələrin müəllifi olduğu, 15 il əvvəl Xocalı faciəsinin baş verdiyi gün yüzlərlə həmvətənləri ilə birlikdə Strasburqda keçirilmiş etiraz aksiyasında iştirak etdiyi diqqətə çatdırmışdır.
İren Məlikoff onu yad edərək 90 illiyinin belə yüksək səviyyədə təşkilinə görə “Azərbaycan evi”nə və iştirakçılara təşəkkürünü bildirmiş, kəşməkəşli həyat yolu keçdiyindən danışmış, doğma Azərbaycana dəfələrlə etdiyi səfərləri və ümummilli lider Heydər Əliyevlə unudulmaz görüşlərini xatırlatmışdır. Uzun illərdən sonra “Azərbaycan evi”nin fəaliyyətə başlamasından qürur hissi duyduğunu və onun ölkəmizi layiqincə təmsil etdiyini diqqətə çəkən İren Məlikoff Azərbaycanı fransızlara tanıtmaq istiqamətində qarşıda hələ çoxlu işlər durduğunu və Fransanın tanınmış alimlərinin bu evə dəvət edilməsi sahəsində öz qüvvəsini əsirgəməyəcəyini xüsusi vurğulamışdır. O, universitetin türkologiya departamentinin professoru Johann Straussun bu məkanda Azərbaycanla bağlı araşdırmalar aparmasından və vaxtilə tələbəsi olmuş müəllim Stefan de Tapinin cəmiyyətin idarə heyətinin üzvü olmasından sevinc hissi keçirdiyini söyləmişdir.
Vaxtilə Strasburqda bir azərbaycanlı tələbənin olmadığını qeyd edən İren Məlikoff hazırda burada 60-dan artıq azərbaycanlı gəncin təhsil almasının böyük hadisə olduğunu bildirmiş, doğma vətənlərini tanıtmaq sahəsində onların mühüm qüvvə olduqlarını xatırlatmış, onları təhsil aldıqları ali məktəblərdə Azərbaycanın adını yüksəklərə qaldırmağa çağırmışdır.
Strasburqdakı Azərbaycanlı Tələbələr Assosiasiyasının keçmiş rəhbəri, “Azərbaycan evi” idarə heyətinin üzvü Valeh Əsgərov tələbələr adından İren xanımı 90 illiyi münasibətiə təbrik etmiş, tanınmış alimlə yaxın tanışlıqdan və dəyərli məsləhətlərindən məmnunluğunu bildirmişdir.
Sonda İren xanım Məlikoff iştirakçıları maraqlandıran suallara ətraflı cabab vermişdir.
Bölmənin digər xəbərləri
