Sudan ordusu hərbi əməliyyatları davam etdirəcəyini bildirib
Bakı, 5 noyabr, AZƏRTAC
Sudanın Təhlükəsizlik və Müdafiə Şurasının iclasında ABŞ-ın humanitar atəşkəs təklifinin müzakirəsi başa çatdıqdan sonra ordu rəhbərliyi hərbiləşdirilmiş çevik reaksiya qüvvələrinə qarşı əməliyyatları davam etdirəcəyini açıqlayıb.
AZƏRTAC “Sinxua” agentliyinə istinadla xəbər verir ki, müdafiə naziri Hasan Kabrun şuranın səfərbərliyi davam etdirməyə və "qiyamçıları məhv etməyə" hazır olmağa çağırdığını bildirib. O, həmçinin "Sudan xalqının döyüşü" adlandırdığı hərbi əməliyyatlar üçün hazırlıqların davam etdiyini deyib. Nazirin sözlərinə görə, iclasda humanitar yardımın çatdırılması və fövqəladə yardım əməliyyatlarının aparılması planları da müzakirə olunub. Bu tədbirlərin həyata keçirilməsinin monitorinqini aparmaq və bütün ölkə ərazisində sabitliyi bərpa etmək üçün xüsusi komitə yaradılıb.
Hökumətdəki mənbə agentliyə bildirib ki, ABŞ-ın təklif etdiyi atəşkəs şura iclasının gündəliyində əsas bənd olsa da, yekun mövqeyə gəlmək mümkün olmayıb.
Sudan ordusu ilə çevik reaksiya qüvvələrinə arasında münaqişə 2023-cü ilin aprelindən bəri davam edir. Döyüşlər on minlərlə sudanlının ölümünə və milyonlarla insanın ölkənin digər yerlərinə və ya xaricə qaçmasına səbəb olub.
Bölmənin digər xəbərləri
