MƏDƏNİYYƏT
Suraxanı rayon Heydər Əliyev Mərkəzində Xocalı soyqırımı qurbanlarının xatirəsi anılıb
Bakı, 22 fevral, AZƏRTAC
Bakı Şəhər Mədəniyyət Baş İdarəsinin Suraxanı rayon Heydər Əliyev Mərkəzində Suraxanı Rayon İcra Hakimiyyətinin birgə təşkilatçılığı ilə Xocalı soyqırımının otuzuncu ildönümünə həsr olunmuş tədbir keçirilib.
Baş İdarədən AZƏRTAC-a bildirilib ki, tədbir iştirakçıları əvvəlcə Heydər Əliyev parkında Ulu Öndərin abidəsini ziyarət edərək önünə gül dəstələri qoyublar. Mərkəzin elmi işçisi Zəkiyyə Hacıyeva Heydər Əliyevin həyat və fəaliyyətini, zəngin siyasi irsini əks etdirən ekspozisiyalarla, “Muzey”, "Rəsm studiyası", “Kitabxana və İnformasiya Texnologiyaları” bölmələri ilə ekskursiya iştirakçılarını tanış edib.
Tədbir Azərbaycan Respublikasının Dövlət Himninin səsləndirilməsi ilə açıq elan olunub. Vətən müharibəsində qəhrəmancasına döyüşmüş, ölkəmizin ərazi bütövlüyü yolunda canlarını fəda etmiş bütün şəhidlərimizin və Xocalı soyqırımı qurbanlarının əziz xatirəsi bir dəqiqəlik sükutla yad edilib.
Tədbiri giriş sözü ilə Suraxanı rayon Heydər Əliyev Mərkəzinin direktor əvəzi Zəkiyə Hacıyeva açaraq qonaqları salamlayıb. Xocalı soyqırımının Azərbaycan tarixinə ən dəhşətli və faciəli səhifələrdən biri kimi daxil olmasından, bütün beynəlxalq hüquq normalarına zidd olaraq Ermənistan dövlətinin Dağlıq Qarabağı özünə birləşdirmək istəyindən, bu yolda bütün cinayət və vəhşiliyə hazır olduqlarını nümayiş etdirməsindən bəhs edərək, Xocalı soyqırımı zamanı 613 nəfərin öldürüldüyünü, 1000 nəfər müxtəlif yaşlı dinc sakinin aldığı güllə yarasından əlil olduğunu, 106 nəfər qadının, 63 azyaşlı uşağın, 70 qocanın öldürüldüyünü, 8 ailənin tamamilə məhv edildiyini, 25 uşağın hər iki valideynini, 30 uşaq isə valideynlərindən birini itirdiyini, faciə baş verən gecə 1275 nəfər dinc sakinin girov götürüldüyünü, onların 150-sinin taleyinin indi də məlum olmamasını qeyd edib.
Bildirilib ki, ümummilli lider Heydər Əliyevin hakimiyyətə qayıdışından sonra Xocalı faciəsi əsl siyasi və hüquqi qiymətini alıb. 1994-cü ildə ulu öndər Heydər Əliyevin təşəbbüsü ilə Azərbaycan parlamenti 26 fevralı - “Xocalı Soyqırımı Günü” kimi qəbul edib. O dövrdən başlayaraq dünya azərbaycanlıları soyqırımının bütün dünyada tanıdılması istiqamətində fəallığa çağırılıb, bununla əlaqədar onlara müraciət edilib. Prezident İlham Əliyev Xocalı faciəsinin təcavüzkar erməni millətçilərinin yüzilliklər boyu Azərbaycan xalqına qarşı apardığı soyqırımı və etnik təmizləmə siyasətinin qanlı səhifəsi kimi qiymətləndirib. Çünki XX əsrin sonunda dünyanın gözü qarşısında baş verən bu kütləvi qırğın hadisəsi öz amansızlığına və qəddarlığına görə təkcə Azərbaycan xalqına qarşı deyil, bütövlükdə bəşəriyyətə və insanlığa qarşı törədilən cinayət idi.
Suraxanı Rayon İcra Hakimiyyətinin şöbə müdiri Elmar Hüseynov Azərbaycan xalqının 200 il ərzində erməni millətçi-şovinistlərinin davamlı olaraq etnik təmizləmə, soyqırımı siyasətinə məruz qalmasından, tarixi torpaqlarından qovulmasından, qaçqın, məcburi köçkünə çevrilməsindən və bütün bunların ermənilər tərəfindən kütləvi qırğınlarla müşayiət olunmasından danışıb.
Sonda Xocalı soyqırımına həsr olunmuş Xocalıdan son sağ qurtulan 6 yaşlı uşağın yaşadıqları real faktlar əsasında çəkilən “Ümid işığı” adlı bədii-sənədli film təqdim olunub.