Suriya ilə Azərbaycan arasında əlaqələr tarixi və strateji xarakter daşıyır - ŞƏRH
Bakı, 15 iyul, AZƏRTAC
Bu gün Azərbaycanın coğrafi mövqeyi və iqtisadi potensialı onun həyata keçirdiyi xarici siyasətin yalnız Cənubi Qafqaz regionu ilə məhdudlaşmadığını göstərir. Yaxın Şərq ölkələri ilə qurulan tərəfdaşlıq münasibətləri isə Azərbaycanın bu bölgədə də fəal siyasət aparmasına şərait yaradır. Azərbaycanın işğaldan azad edilmiş Qarabağ bölgəsində apardığı uğurlu bərpa və quruculuq işləri, habelə regionda sülhün təmin olunması ölkəmizə beynəlxalq arenada etimadı əhəmiyyətli dərəcədə yüksəldib. Hazırda Yaxın Şərqdə maraqlar toqquşması yaşayan ölkələr məhz dialoq və danışıqlar üçün Azərbaycana ehtiyac duyurlar. Bu baxımdan Suriya Ərəb Respublikasının keçid dövrü Prezidenti Əhməd Əl Şaraanın ölkəmizə səfəri Azərbaycanın Yaxın Şərq regionunda əlaqələrinin daha da genişlənməsində sülhə və dialoqa, eyni zamanda, Suriyada bərpa və quruculuq işinə töhfə verməsində mühüm əhəmiyyət kəsb edir.
Bu fikirləri AZƏRTAC-a açıqlamasında Azərbaycan-Amerika Gəncləri İctimai Birliyinin sədri Vüqar Əhmədov söyləyib.
O qeyd edib ki, Suriya ilə Azərbaycan arasında əlaqələr tarixi və strateji xarakter daşıyır. Bu baxımdan da Azərbaycanın Suriyanın yenidən qurulmasında iştirakı Yaxın Şərq regionunda mövqelərimizin möhkəmlənməsi baxımından ölkəmizin maraqlarına cavab verir: “Şübhəsiz ki, Suriyada sabitliyin və sülhün qorunub saxlanmasında Azərbaycan strateji tərəfdaşımız olan Türkiyə ilə koordinasiyalı şəkildə hərəkət edir. Eyni zamanda, ölkəmizin digər strateji tərəfdaşı olan İsrailin də Suriyada maraqları olduğundan, Azərbaycan bu maraqları uzlaşdırmağa və bölgənin inkişafına töhfə verməyə çalışır. Enerji təhlükəsizliyi və qaz anlaşması baxımından Azərbaycan Prezidenti və Suriya Prezidenti arasında aparılan danışıqlar təkcə iki ölkənin maraqları baxımından deyil, ümumilikdə region üçün yeni perspektivlər vəd edir. Azərbaycan Avropanın enerji təhlükəsizliyində mühüm rol oynadığı kimi, bu gün bu missiyanı Yaxın Şərq regionunda da davam etdirir. Əlbəttə ki, burada təkcə enerji resursları deyil, eyni zamanda, Azərbaycanın həyata keçirdiyi uğurlu diplomatiya, öz strateji tərəfdaşları ilə birgə hərəkət etməsi əsas amillərdən hesab oluna bilər. Bu, Azərbaycanın həm regional, həm də qlobal miqyasda etibarlı tərəfdaş kimi tanındığını nümayiş etdirir. Eyni zamanda, zəngin enerji ehtiyatları üzərində formalaşan maraqlar və bu sahədə artan rəqabət beynəlxalq aktorların Azərbaycanla əməkdaşlığa daha çox önəm verməsinə səbəb olur. Beləliklə, Azərbaycan Avropa və Mərkəzi Asiya regionunda olduğu kimi, Yaxın Şərq bölgəsinə də fəal aktor kimi daxil olur, uzun müddət müharibə və dağıntılarla üzləşmiş Suriyanın yenidən qurulması və bərpasında, enerji təminatında, humanitar yardımların verilməsində fəal iştirak edir. Bütün bunlar onu göstərir ki, Azərbaycan dövlətinin xarici diplomatiyası, enerji resursları və humanitar imkanları ölkəmizin strateji maraqlar kəsb edən regionlarda sülhə, inkişafa və dialoqa xidmət edir”.
Vüqar Əhmədov vurğulayıb ki, Suriya ilə Azərbaycan arasında həm xalqlar, həm də dövlətlər səviyyəsində tarixən dostluq münasibətləri mövcud olub: “Suriyada daha konstruktiv qüvvələrin hakimiyyətə gəlişi ilə bu əlaqələr müsbət məcrada inkişaf etməyə başlayıb. Antalya Diplomatiya Forumunda Azərbaycan Prezidenti ilə Suriya Ərəb Respublikasının keçid dövrü Prezidenti Əhməd Əl Şaraa arasında yaranan səmimi münasibətlər ölkələrimiz arasında yenidən tərəfdaşlıq əlaqələrinin inkişafına əsas yaradıb. Hazırda Azərbaycanla Suriya arasındakı münasibətlər Azərbaycanın Suriyanın ərazi bütövlüyünə və suverenliyinə verdiyi dəstək, habelə Azərbaycan qazının bu ölkəyə nəqli kontekstində aktuallıq qazanır. Həm Azərbaycan, həm Suriya öz ərazisində müharibə və dağıntılardan əziyyət çəkən ölkələr olub. Bu baxımdan Azərbaycan hər zaman ədalətsizliklərlə üzləşmiş ölkələrə dəstəyini göstərir. Şübhəsiz ki, Azərbaycanın belə mühüm beynəlxalq missiya ilə çıxış etməsi ölkəmizə olan qlobal etimad və inamı daha da gücləndirəcək. Eyni zamanda, onun Yaxın Şərqdə və İslam aləmində nə qədər mühüm bir ölkəyə çevrildiyini bir daha nümayiş etdirəcək. Məhz bu uğurlu xarici siyasətin nəticəsidir ki, bu gün Azərbaycan dövləti həm Avropada, həm Mərkəzi Asiya arialında, həm Yaxın Şərq regionunda, o cümlədən müsəlman ölkələri arasında böyük hörmət və etimad qazanıb”, - deyə Vüqar Əhmədov qeyd edib.
Bölmənin digər xəbərləri
