Qax, 19 may, Mustafa Dadaşov, AZƏRTAC

“Şuşa İli” çərçivəsində mayın 19-da Qax rayon Mədəniyyət Mərkəzində “Şuşa - bitən həsrətin hekayəsi” adlı ədəbi-bədii gecə keçirilib. Tədbirdə Qax Rayon İcra Hakimiyyətinin, Şəki Regional Mədəniyyət İdarəsinin rəhbər şəxsləri, ziyalılar, ictimaiyyət nümayəndələri, mədəniyyət işçiləri, şəhid ailələrinin üzvləri, Vətən müharibəsinin iştirakçıları, qazilər və gənclər iştirak ediblər.

AZƏRTAC-ın bölgə müxbiri xəbər verir ki, tədbir iştirakçıları əvvəlcə Mədəniyyət Mərkəzinin qarşısında təşkil edilən uşaqların Şuşaya həsr etdikləri rəsm əsərləri və əl işlərindən ibarət sərgiyə baxıb, rayon Mərkəzi Kitabxanası tərəfindən hazırlanmış Şuşaya və Şuşa ziyalılarına həsr edilən kitab sərgisi ilə tanış olublar.

Tədbirin əvvəlində ərazi bütövlüyümüz uğrunda canını qurban vermiş şəhidlərimizin əziz xatirəsi bir dəqiqəlik sükutla yad edilib.

Ədəbi-bədii gecədə qeyd olunub ki, Qarabağın tacı olan Şuşa xalqımız üçün müqəddəs və əziz məkandır. Şuşa sevgisi hər bir azərbaycanlının mənəvi varlığının ayrılmaz parçasıdır. Təməli 1752-ci ildə Qarabağ xanı Pənahəli xan tərəfindən qoyulan və bu il 270 illiyi qeyd olunan Şuşa şəhəri zəngin inkişaf yolu keçib, Azərbaycanın və bütün Cənubi Qafqazın mədəni və ictimai-siyasi həyatında müstəsna rol oynayıb. Bu şəhər yetişdirdiyi böyük şəxsiyyətləri ilə ədəbi-mədəni, elmi və ictimai fikir salnaməmizə əlamətdar səhifələr yazıb.

Vurğulanıb ki, haqq işi naminə apardığımız 44 günlük Vətən müharibəsində rəşadətli Azərbaycan Ordusu 2020-ci il noyabrın 8-də tarixi, mədəni və strateji əhəmiyyətə malik, Qarabağımızın tacı olan Şuşa şəhərini işğalçılardan azad edib. Şuşa qalibiyyəti xalqımızın qəhrəmanlıq ruhunun təntənəsinə çevrilərək, tariximizə Zəfər Günü kimi həkk olunub.

Qeyd edilib ki, Şuşa qəhrəmanlıq şəhəridir. Hər küçəsində, hər divarında, hər qarış torpağında şəhid haqqı, şəhid baxışları var. Bu şəhər ulu babalarımızın bizə miras qoyduğu əzəmətli abidədir. İndi biz dünyaya Şuşa zirvəsindən baxırıq. Bu torpaqların əbədi və əzəli sahibi kimi.

Ədəbi-bədii gecə rayon Mədəniyyət Mərkəzinin hazırladığı rəngarəng konsert proqramı ilə davam edib. Mərkəzin “Çeşmə” instrumental ansamblının müşayiəti ilə müğənnilərin ifa etdikləri Şuşanı tərənnüm edən xalq və bəstəkar mahnıları, IV “Xarıbülbül” festivalının iştirakçısı, Qaxingiloy kənd Mədəniyyət evinin “Şvitkatso” Gürcü Xalq Xorunun, Rayon Mədəniyyət Mərkəzinin İ.Dağıstanlı adına Xalq teatrı üzvlərinin çıxışları, Almalı kənd Mədəniyyət evinin dram dərnəyi üzvlərinin hazırladığı S.Vurğunun “Vaqif” dramından səhnə, Uşaq İncəsənət Məktəbinin və Əlibəyli kənd Mədəniyyət evinin rəqs qruplarının təqdim etdikləri şux, oynaq rəqslər və digər musiqi nömrələri tamaşaçılar tərəfindən maraqla qarşılanıb.

Tədbirin sonunda Qax Rayon İcra Hakimiyyəti başçısının müavini Vəfa Heydərova və Şəki Regional Mədəniyyət İdarəsinin rəisi vəzifəsi səlahiyyətlərini icra edən Tərlan Nəsibov çıxış edərək, Prezident İlham Əliyevin Sərəncamı ilə 2022-ci ilin Azərbaycanda “Şuşa İli” elan edildiyini, bununla əlaqədar respublikanın hər yerində, o cümlədən Qax rayonunda silsilə tədbirlərin keçirildiyini bildirib, maraqlı və rəngarəng bədii proqrama görə tədbirin təşkilatçılarına təşəkkür ediblər. Vurğulanıb ki, 2022-ci il Şuşanın həyatında ən yaddaqalan illərdən biri olacaq.

Sonda Mədəniyyət Mərkəzinin “Şuşa İli” ilə əlaqədar təşkil etdiyi rəsm müsabiqəsinin qaliblərinə diplomlar təqdim olunub.