Şuşa, Xocalı, Xocavənd və Xankəndidən olan məktəblilər arasında şahmat yarışı keçirilib
Bakı, 14 mart, AZƏRTAC
Şahmat Azərbaycanda geniş yayılmış ənənəvi idman oyunlarından biridir və xalqımızın idman tarixində özünəməxsus yer tutur. İntellektual idman növü kimi, şahmatın inkişafına ötən əsrin 70-ci illərindən etibarən respublikamızda böyük diqqət göstərilib. Məhz ulu öndər Heydər Əliyevin təşəbbüsü ilə ötən əsrin 70-ci illərindən etibarən respublikamızın 60-a yaxın şəhər və rayonunda uşaq-gənclər şahmat məktəbləri tikilib istifadəyə verilib. Hələ Sovet İttifaqı dövründə dünya şahmat tacının Azərbaycana gətirilməsində də ulu öndər Heydər Əliyevin əvəzsiz xidmətləri olub.
2009-cu il mayın 5-də dövlətimizin başçısı İlham Əliyev tərəfindən “2009-2014-cü illər üçün Azərbaycan Respublikasında şahmatın inkişafı” Dövlət Proqramının təsdiq edilməsi haqqında Sərəncam imzalanıb. Bu Sərəncamın Bakıda keçirilmiş və ulu öndər Heydər Əliyevin xatirəsinə həsr edilmiş möhtəşəm Azərbaycan-FİDE dünya matçı ərəfəsində imzalanması təsadüf deyil.
Azərbaycan dövlət müstəqilliyini bərpa etdiyi vaxtdan bəri keçən müddət ərzində şahmatçılarımız müxtəlif beynəlxalq yarışlarda, dünya və Avropa çempionatlarında ölkəmizi layiqincə təmsil edərək yüksək nəticələrə nail olub, 80-dən çox medal, o cümlədən 32 qızıl medal qazanıblar. Hazırda Azərbaycanda 25 beynəlxalq qrossmeyster, 16 beynəlxalq usta, 20 FİDE ustası, 15 beynəlxalq hakim və 16 FİDE hakimi vardır. Azərbaycan şahmatı dünya arenasında artıq elə bir yüksəlişə keçib ki, hətta 2014-cü ildə Norveçdə keçirilmiş Ümumdünya Şahmat Olimpiadasında komandamız 179 ölkə arasında 2-5-ci yerləri bölüşdürüb.
Dövlət Proqramının əsas məqsədi şahmat sahəsində dövlət siyasətinin həyata keçirilməsi, ölkədə şahmatın və onun infrastrukturunun daha da inkişaf etdirilməsi, beynəlxalq səviyyəli şahmatçıların, məşqçilərin, hakimlərin və digər şahmat mütəxəssislərinin hazırlanmasının təmin edilməsidir. Ölkənin bu sahə üzrə beynəlxalq miqyasda rolunun artırılması, qarşıya qoyulan məqsədlərə nail olmaq üçün tədbirlər planının həyata keçirilməsi Dövlət Proqramının əsas istiqamətlərindəndir.
Bu gün də ölkəmizdə şahmat idman növünün inkişafına, o cümlədən ümumi təhsil məktəblərinin şagirdləri arasında fənnin mənimsənilməsinə dövlət tərəfindən qayğı göstərilir.
Məktəblilər arasında şahmat idman növünü təbliğ etmək, şahmatçıların təsnifat dərəcələrini artırmaq, “Şahmat” fənni tədris edilən pilot ümumtəhsil məktəblərində bu fənnin mənimsənilmə səviyyəsini artırmaq məqsədilə Azərbaycan Respublikası Təhsil Nazirliyi tərəfindən müvafiq dövlət və ictimai təşkilatlarla birlikdə ümumtəhsil məktəblərinin şagirdləri arasında respublika şahmat festivalı və digər tədbirlər keçirilir.
“Azərbaycan Respublikası Dağlıq Qarabağ Bölgəsinin Azərbaycanlı İcması” İctimai Birliyi İdarə Heyətinin bu ilin yanvarında qəbul olunmuş müvafiq qərarı ilə Şuşa, Xocalı və Xocavənd rayonlarının, həmçinin Xankəndi şəhərinin ümumtəhsil müəssisələrinin şagirdləri arasında Azərbaycan xalqının qarşıdan gələn milli bayramı - Novruz münasibətilə ölkəmizdə intellektual idman növü kimi geniş yayılan, xalqımızın mədəniyyətində özünəməxsus yer tutan, ənənəvi idman növü olan şahmat üzrə açıq birinciliyi keçirilib. Yarışın təşkili və keçirilməsi üçün Əsasnamə təsdiq olunub, Təşkilat Komitəsi və Hakimlər Kollegiyası yaradılıb.
Şahmat yarışı 2016-cı ilin fevral-martında üç mərhələdə təşkil olunub. Birinci mərhələ fevralda məktəblərdə, ikinci mərhələ martın 5-də rayonlarda, final mərhələsi isə martın 11-də Bakıda Şuşa şəhər 1 nömrəli tam orta məktəbin binasında keçirilib. Beynəlxalq Şahmat Federasiyasının (FİDE) qaydalarına uyğun aparılan turnirdə 200-ə yaxın gənc şahmatçı mübarizə aparıb.
Yarışın qalibləri və fərqlənənlər “Azərbaycan Respublikası Dağlıq Qarabağ Bölgəsinin Azərbaycanlı İcması” İctimai Birliyi, Təhsil Nazirliyi, həmçinin Şuşa, Xocalı və Xocavənd rayon təhsil şöbələri, gənclər və idman idarələri tərəfindən mükafatlandırılıb. Onlara diplom və hədiyyələr, o cümlədən 7-12 və 13-15 yaş qrupları üzrə birinci yeri tutan şagirdlərə İctimai Birliyin sədrinin kuboku təqdim olunub.
“Azərbaycan Respublikası Dağlıq Qarabağ Bölgəsinin Azərbaycanlı İcması” İctimai Birliyi İdarə Heyətinin sədri, Şuşa Rayon İcra Hakimiyyətinin başçısı Bayram Səfərov, təhsil nazirinin müavini Firudin Qurbanov, deputat Flora Qasımova və başqaları Prezident İlham Əliyevin və Heydər Əliyev Fondunun prezidenti Mehriban Əliyevanın ölkəmizdə şahmatın inkişafına göstərdikləri diqqət və qayğıdan, təhsil sistemində fəaliyyət göstərən uşaq-gənclər idman və şahmat məktəblərinin fəaliyyətindən, kadr potensialından, məşq prosesində iştirak edən idmançıların göstərdiyi nəticələrdən və qarşıda duran problemlərdən danışıblar.
Sonda yarış iştirakçıları ilə xatirə şəkli çəkdirilib.
Bölmənin digər xəbərləri
