Sutəmizləyici qurğular Xəzər sahillərində çirklənmənin qarşısını almışdır
Bakı, 14 iyun (AZƏRTAC). Ekologiya və Təbii Sərvətlər Nazirliyi Abşeron yarımadasının kanalizasiya şəbəkəsi olmayan Bilgəh, Buzovna, Mərdəkan, Pirşağı, Nardaran sahil zolaqlarında, “Amburan” çimərliyində, Novxanı və Corat bağlarının sahilboyu ərazilərində beynəlxalq standartlara cavab verən 17 modul tipli çirkab sutəmizləyici qurğu quraşdırmışdır.
Nazirliyin mətbuat xidmətindən AZƏRTAC-a bildirmişlər ki, qurğuların quraşdırıldığı ərazilərdə aparılan monitorinqin nəticələrinə görə, 2007-ci illə müqayisədə mikrobioloji baxımdan çirklənmənin qarşısı alınmışdır. Artıq Abşeron yarımadasının şimal zonasındakı ərazilərdən dənizə axıdılan tullantı suları idarə olunur. Dənizdə mikrobioloji baxımdan çirklənmənin dərəcəsi tədricən azalmağa başlamış, son illər ərzində bağırsaq çöplərinin miqdarı minimum həddə enmişdir.
Lakin belə qurğuların quraşdırılmadığı məntəqələrdə ötən il olduğu kimi (Səbail rayonunun Şıx və Qaradağ rayonunun Sahil qəsəbəsinin çimərlik ərazilərində) bu il də mikrobioloji baxımdan çirklənmə qeydə alınmış, bağırsaq çöpü bakteriyalarının miqdarı normadan artıq olmuşdur.
Modul tipli çirkab sutəmizləyici qurğular quraşdırılmış qəsəbələrin sahil zolağında aparılan son tədqiqatların nəticələri bunu deməyə əsas verir ki, həmin qəsəbələrin sahil zolağındakı çimərlik sahələri (“Sumqayıt”, “Sahil” və “Şıx” çimərliklərindən başqa) çimmək üçün yararlıdır.
Bölmənin digər xəbərləri
