TACİKİSTANDA QAR UÇQUNLARI NƏTİCƏSİNDƏ 6 NƏFƏR HƏLAK OLMUŞDUR

14.01.2004 [12:21]
Çap et
A⁺ A^-

Tacikistanın Dağ-Bədəxşan Muxtar Vilayətində yanvarın 9-dan 12-dək yağan aramsız qar fəlakətlə nəticələnmişdir. Pamir dağlarından gələn qar uçqunları 6 nəfərin həyatına son qoymuşdur.

Tacikistan Fövqəladə Hallar Nazirliyindən AZƏRTAC-ın xüsusi müxbirinə demişlər ki, vilayətin Roştkalin, Ruşan, Kalay-Xumb rayonlarındakı qar uçqunları vilayət mərkəzi Xoroq şəhərinə gedən nəqliyyat yollarını bağlamışdır. Bu ərazidə telefon və radio rabitəsi kəsilmişdir. Yüzlərlə mülki və inzibati binaya ziyan dəymişdir. Qunt çayı üzərindəki Pamir elektrik stansiyası təhlükə qarşısındadır. Kalay-Xumb və Ruşan rayonlarında yeni qar uçqunları gözlənilir.

Fövqəladə Hallar Nazirliyinin qərargah rəisi Maxmadəli Xalimov bildirmişdir ki, dəyən zərərin həcmi 350 min dollardan çoxdur.