Tamam Cəfərova: Silahlı Qüvvələrimizin daha da modernləşdirilməsi dövlət siyasətinin strateji istiqamətlərindəndir
Bakı, 26 iyun, AZƏRTAC
Yaradılmasının 103-cü ildönümündə Azərbaycan Silahlı Qüvvələrinin hər bir nümayəndəsi bu günü qalib ordunun əsgər və zabitləri kimi qeyd edir. Prezident, Müzəffər Ali Baş Komandan İlham Əliyevin rəhbərliyi ilə Vətən müharibəsində qazandığımız Zəfər Azərbaycan tarixinin ən şanlı səhifələrindən biridir.
Bunu AZƏRTAC-a açıqlamasında Milli Məclisin deputatı Tamam Cəfərova deyib.
Deputat qeyd edib ki, Azərbaycan Silahlı Qüvvələri 44 günlük Vətən müharibəsində dünyanın ən güclü ordularından biri olduğunu sübut etdi. Azərbaycanın Vətən müharibəsində tətbiq etdiyi hərbi strategiya və taktikalar dünyanın ən güclü ordularına malik dövlətlər tərəfindən də maraqla qarşılanır və hətta NATO səviyyəsində öyrənilir.
Azərbaycan Silahlı Qüvvələrinin şanlı tarixinin Azərbaycan Xalq Cümhuriyyətinin yaranması ilə bağlı olduğunu vurğulayan T.Cəfərova deyib: “Azərbaycan Xalq Cümhuriyyəti cəmi 23 ay yaşamasına baxmayaraq, ölkədə ordu quruculuğu sahəsində əhəmiyyətli addımlar ata bildi. Təəssüf ki, Cümhuriyyətin süqut etməsi nəticəsində ordu quruculuğu sahəsində görülən işlər də yarımçıq qaldı. Yalnız ulu öndər Heydər Əliyevin 1969-cu ildə hakimiyyətə gəlişindən sonra onun müstəsna xidmətləri sayəsində ölkəmizdə hərbi kadrların hazırlanması prosesi başlandı. Heydər Əliyev 1971-ci ildə böyük zəhmətlər bahasına Azərbaycanda hərbi kadrlar hazırlayan məktəbin - görkəmli sərkərdə Cəmşid Naxçıvanskinin adını daşıyan Hərbi Liseyin yaradılmasına nail oldu. Azərbaycan müstəqilliyini bərpa edəndən məhz bu məktəb ordu quruculuğunda əsas bazalardan birinə çevrildi. Ulu Öndərin sayəsində azərbaycanlı gənclərin Bakı Ali Birləşmiş Komandanlıq və Bakı Ali Hərbi Dənizçilik məktəblərində oxuması, eləcə də SSRİ-nin digər hərbi məktəblərinə güzəştli şərtlərlə qəbul edilməsi mümkün oldu.
1990-cı illərin ortalarından başlayaraq Azərbaycanın NATO ilə sıx və səmərəli əməkdaşlığı ordu quruculuğu prosesinin təkmilləşdirilməsinə, Silahlı Qüvvələrimizin modernləşdirilməsinə, müasir standartlara uyğunlaşdırılmasına gətirib çıxardı”.
Deputat bildirib ki, ordu quruculuğu sahəsində ulu öndər Heydər Əliyevin həyata keçirdiyi qətiyyətli və uzaqgörən siyasət Prezident, Müzəffər Ali Baş Komandan İlham Əliyev tərəfindən uğurla davam etdirilir. Prezident İlham Əliyevin xüsusi diqqət və qayğısı sayəsində son illər Ordumuzun döyüş qabiliyyəti daha da yüksəlib, maddi-texniki bazası əhəmiyyətli dərəcədə möhkəmləndirilib, hərbçilərin sosial vəziyyətinin yaxşılaşdırılması istiqamətində mühüm addımlar atılıb. Silahlı Qüvvələrin daha da modernləşdirilməsi və ən son hərbi texnologiyaların orduda tətbiq olunması Prezident İlham Əliyevin siyasətinin strateji istiqamətlərindəndir. Bu sayədə Azərbaycanın müzəffər Ordusu dövlət və xalqla “Dəmir yumruq” kimi sarsılmaz birlik nümayiş etdirərək düşməni məhv etdi.
Tamam Cəfərova vurğulayıb ki, ötən 17 ildə hərbi qulluqçuların sosial müdafiəsinə, mənzil təminatının yaxşılaşdırılmasına Prezident İlham Əliyev tərəfindən xüsusi diqqət yetirilib. Vətən müharibəsində döyüşən hərbçilərimizin müxtəlif orden və medallarla təltif olunması müharibə iştirakçılarına göstərilən ali diqqətin təzahürüdür. Ərazilərimizin işğaldan azad olunması zamanı hərbi əməliyyatlarda iştirak edərək igidlik və şücaət göstərmiş, vəzifə borcunu ləyaqətlə və vicdanla, döyüş tapşırıqlarını uğurla yerinə yetirmiş Silahlı Qüvvələrin hərbi qulluqçuları Prezident, Müzəffər Ali Baş Komandan İlham Əliyevin sərəncamları ilə müxtəlif orden və medallarla təltif olunublar, onların maaşlarına əlavələr edilib.
“Möhtəşəm Zəfərimizi şərtləndirən amillərdən kimi də məhz birliyimiz, həmrəylimiz oldu. “Dəmir yumruq” birliyimizin rəmzidir. Azərbaycan xalqı yumruq kimi birləşib. Bu birlik əbədi olacaq və gələcəkdə də qarşıda duran məsələləri həll etmək üçün imkan yaradacaq. Dövlətin gücü Azərbaycan xalqının dəstəyindədir.
Xalqımızı Silahlı Qüvvələr Günü münasibətilə təbrik edir, bu qüruru bizlərə yaşadan şəhidlərimizi rəhmət və ehtiramla yad edir, qazilərimizə cansağlığı diləyirik”, - deyə deputat Tamam Cəfərova qeyd edib.
Bölmənin digər xəbərləri
