Tarix Muzeyində “Vışka” qəzetinin 222-ci nömrəsinin əlavəsi qorunur
Bakı, 7 iyul, AZƏRTAC
AMEA-nın Milli Azərbaycan Tarixi Muzeyi Sənədli mənbələrin elmi fond şöbəsində “Vışka” qəzetinin 222-ci (2133) nömrəsinin əlavəsi qorunur. Qəzetin bu xüsusi buraxılışı İran şairi Firdovsinin anadan olmasının 1000 illiyinə həsr edilib.
Muzeydən AZƏRTAC-a bildiriblər ki, dörd səhifədən ibarət qəzet ipək parça üzərində çap olunub. Qəzetin 1-ci səhifəsində Rusiya heykəltəraşı E.Gendelmanın yaratdığı Firdovsi büstünün Azərbaycan Dövlət Muzeyində nümayişi zamanı çəkilən fotoşəkli dərc edilib. İkinci və üçüncü səhifələrində ədəbiyyatşünas, publisist, professor Vəli Xuluflunun şair Firdovsi və onun şah əsəri - “Şahnamə” poeması barədə məqaləsi yer alıb.
Qəzetdə “Şahnamə” poeması üçün çəkilmiş rəngli illüstrasiyalar yerləşdirilib. Qəzetin 222-ci nömrəsi 1934-cü il sentyabrın 29-da Bakının “İnternasional” mətbəəsində çap edilib.
Bu material elmi-tədqiqat baxımından əhəmiyyətlidir.
Bölmənin digər xəbərləri
