Tatyana Tixomirova: Heydər Əliyev Fondunun şəhərimizin inkişafına verdiyi töhfəni yüksək qiymətləndiririk
Həştərxan, 26 oktyabr, AZƏRTAC
Azərbaycanla Rusiyanın Həştərxan vilayətini çoxdankı sıx əlaqələr birləşdirir. Heydər Əliyev Fondunun dəstəyi ilə Rusiyanın bu şəhərində “Azərbaycan-Rusiya Dostluq Körpüsü” tikilib, Heydər Əliyev adına park salınıb, Knyaz Vladimirin abidəsi ucaldılıb, məktəb binası əsaslı təmir olunub, “Dostluq” uşaq bağçası inşa edilib.
Heydər Əliyev adına 11 nömrəli məktəb 2011-ci ildə əsaslı təmir olunub. Burada 800-ə yaxın şagird təhsil alır. Məktəbin direktoru Tatyana Tixomirova AZƏRTAC-a müsahibəsində bu təhsil müəssisənin tarixindən və fəaliyyətindən bəhs edib.
-Tatyana Yevgenyevna, məktəbinizin tarixindən bəhs etmənizi istərdik.
-Məktəbimizin binası 1937-ci ildə inşa edilib. Müharibə illərində burada hərbi hospital yerləşib. Bilirsiniz ki, bina köhnə olub və müasir dövrün tələblərinə cavab vermirdi. 2011-ci ildə Heydər Əliyev Fondu məktəb binasını əsaslı təmir etməyi qərara aldı. Bunun üçün məhz bizim məktəbin seçilməsi hər şeydən əvvəl onun “Bakı” küçəsində yerləşməsi ilə bağlı idi. Yarım il ərzində genişmiqyaslı təmir işləri aparıldı. Nəticədə bina əsaslı təmir olundu, əlavə olaraq idman və akt zalları, yeməkxananın yerləşdiyi iki korpus da tikildi. Beləliklə, məktəbimizin tarixi iki hissəyə - 2011-ci ilədək və əsaslı təmirdən sonrakı dövrlərə bölünmüş oldu. Bizim keçirdiyimiz əmək kollektivinin ümumi iclası və valideynlər arasında sorğu nəticəsində məktəbimizə Azərbaycanın ümummilli lideri Heydər Əliyevin adının verilməsi barədə qərar qəbul olundu. Müəllimlərin və valideynlərin əksəriyyəti sovet dövründə yaşamış və təhsil almış insanlardır. Onlar Heydər Əliyev şəxsiyyətinin əhəmiyyətini çox gözəl anlayırlar. Biz Heydər Əliyev Fondunun şəhərimizin inkişafına verdiyi töhfəni yüksək qiymətləndiririk.
-Əsaslı təmirdən sonra məktəbinizdə hansı dəyişikliklər oldu?
- Rusiyada olan digər dövlət məktəbləri kimi bizdə şagirdlərin müsabiqə yolu ilə qəbulu aparılmır. Gələn bütün uşaqları qəbul edirik. Məktəbdə 23 milliyyət və xalqlara məxsus olan uşaqlar təhsil alırlar. Əsaslı təmir başlayanda şagirdlər arasında yeddi azərbaycanlı var idi. Lakin artıq növbəti dərs ilinin əvvəlində məktəbimizə 30 azərbaycanlı şagird qəbul olundu. Hazırda məktəbdə təhsil alan 800 şagirdin 10 faizi azərbaycanlılardır. Məktəbimiz çoxmillətlidir. Yəqin ki, bizdə olan tolerantlıq və multikulturalizm atmosferinə çox az yerdə rast gəlmək olar. Milli mədəniyyət günlərinin, festivalların keçirilməsi birdəfəlik aksiyalar deyil, bu, sadəcə bizim həyat tərzimiz və dünyagörüşümüzlə bağlıdır.
-Məktəbiniz Azərbaycanın təhsil müəssisələri ilə əməkdaşlıq edirmi?
- Bizim məktəb Bakının Nərimanov rayonu ilə sıx əməkdaşlıq edir, məktəblilərin qarşılıqlı səfərləri həyata keçirilir. Azərbaycanın təhsil müəssisələri ilə qardaşlaşma əlaqələri yaratmağı nəzərdə tuturuq. Ənənəvi olaraq biz Rusiya və Azərbaycan arasında əlaqələrə həsr olunmuş böyük tədbirlər keçiririk. Artıq keçirdiyimiz “Dostluq xalçası” ədəbi-musiqi axşamında biz Azərbaycan xalça sənətindən söz açdıq. Axı xalça birləşdirici amildir, Azərbaycan xalçaları isə bütün dünyada məşhurdur. Şagirdlərimiz hər il yay tətilində Azərbaycanda olurlar və onlarda böyük təəssürat yaradan Xalça Muzeyini ziyarət edirlər. Bundan başqa, biz Nizami Gəncəvinin və Yeseninin yaradıcılığına həsr olunmuş tədbirlər keçirmişik. Rusiyanın Azərbaycanlı Gənclər Birliyinin Həştərxan regional bölməsi ilə də sıx əməkdaşlıq edirik. Hər il Heydər Əliyevin həyatı ilə bağlı əlamətdar günlərdə müxtəlif tədbirlər - yaradıcılıq işləri, şeir və inşa müsabiqələri təşkil edirik. İki şagirdimizin yazdığı esselər Heydər Əliyevin 90 illiyi münasibətilə nəşr edilmiş “Heydər Əliyev məktəblilərin gözü ilə” kitabında yer alıb.
Fəridə Abdullayeva
AZƏRTAC-ın xüsusi müxbiri
Həştərxan
Bölmənin digər xəbərləri
