Təbrizdə çıxan “Soxrab” qəzetində Şuşa haqqında məqalə dərc olunub
Tehran, 5 noyabr, AZƏRTAC
Təbrizdə çıxan “Soxrab” qəzetində Azərbaycanın qədim Şuşa şəhəri haqqında geniş məqalə dərc olunub.
AZƏRTAC xəbər verir ki, məqalədə şəhərin tarixi, mədəniyyəti, işğal dövründə ermənilər tərəfindən dağıdılması barədə geniş məlumat verilib. Nəzərə çatdırılıb ki, 270 yaşı olan Şuşa şəhəri Azərbaycanın incisi hesab olunur və bu diyar ölkəmizə çox sayda dünyaşöhrətli mədəniyyət, ədəbiyyat, incəsənət xadimləri bəxş edib. Əfsuslar olsun ki, XX əsrin 90-cı illərinin əvvəllərində SSRİ rəhbərliyinin ermənilərə himayədarlığı sayəsində Qarabağ bölgəsində erməni separatizmi təşəkkül tapmağa başladı. Qarşısı alınmadığı üçün hadisələr daha da mürəkkəbləşdi. Həmin dövrdə SSRİ-nin süqutuna aparan tarixi-siyasi proseslər fonunda bəzi xarici qüvvələrin də dəstəyini alan Ermənistan Azərbaycan ərazilərinə hərbi qüvvə yeridərək işğala başladı və 1992-ci il mayın 8-də Şuşa işğal edildi. İşğal nəticəsində şəhərdə 195 Azərbaycan vətəndaşı xüsusi amansızlıqla qətlə yetirildi, 165 nəfər yaralandı. Onlardan 150 nəfəri əlil oldu, 552 körpə valideynlərini itirdi, 20 mindən artıq əhali doğma evini tərk edərək məcburi köçkün vəziyyətinə düşdü, 58 nəfər isə girov götürüldü. Eləcə də işğal dövründə şəhərdəki yüzlərlə tarix və mədəniyyət yadigarları, məscidlər və dini abidələr erməni vandalizmi nəticəsində dağıdıldı. Lakin Azərbaycan xalqı heç bir vaxt bu işğal faktı ilə razılaşmadı. İşğal altındakı torpaqların, o cümlədən Qarabağın incisi Şuşanın azad ediləcəyi günü səbirsizliklə gözlədi. Ulu Öndər Heydər Əliyev, daha sonra Prezident İlham Əliyev bütün çıxışlarında Şuşa ilə bağlı duyğu və düşüncələrini həmişə xalqla bölüşmüşdü. Onlar Şuşanın azad olunacağı günə inanırdılar və xalqı da hər zaman buna inandırırdılar. Ulu Öndər söyləyirdi ki, “Şuşa təkcə şuşalılar üçün yox, bütün azərbaycanlılar üçün, vətənini, millətini sevən hər bir vətəndaşımız üçün əziz bir şəhərdir, əziz bir qaladır, əziz bir abidədir”. Eləcə də onun ölkəmiz, Vətənimiz üçün xüsusi, vacib yeri olduğunu vurğulayaraq bildirmişdi ki, “Şuşasız Qarabağ, Qarabağsız isə ümumiyyətlə Azərbaycan yoxdur”. Ulu Öndərin bu sözləri Şuşanın bizim üçün nə dərəcədə dəyərli olduğunun açıq və sərrast ifadəsi idi.
Nəhayət, 2020-ci il noyabrın 8-də 28 illik həsrət sona çatdı. Azərbaycan Respublikasının ədalət naminə apardığı 44 günlük Vətən müharibəsində rəşadətli Azərbaycan Ordusu Şuşa şəhərini azad etdi. Bu torpaqlarda yenidən Azan səsinin ucalmasına imkan yaratdı. Ermənistanın kapitulyasiyasına yol açan Şuşa qalibiyyəti xalqımızın qəhrəmanlıq ruhunun təntənəsinə çevrilərək tariximizə Zəfər Günü kimi həkk olunub.
AZƏRTAC-ın xüsusi müxbiri
Tehran
Bölmənin digər xəbərləri
