Təhsil eksperti: Azərbaycanda əcnəbi tələbələrin sayı əvvəlki illərə nisbətdə artıb
Bakı, 24 aprel, AZƏRTAC
Azərbaycanda təhsil alan əcnəbi tələbələrin sayı əvvəlki illərə nisbətdə artan temp üzrə gedir.
Bunu AZƏRTAC-a açıqlamasında Sosial Tədqiqatlar Mərkəzinin əməkdaşı, təhsil eksperti Elmin Nuri deyib. O xatırladıb ki, iki il bundan öncə ilk dəfə olaraq ölkəmizdə oxuyan xarici tələbələrin ümumi sayı 10 minə çatıb: “Daha əvvəlki illərdə bu rəqəm 7-8 min aralığında dəyişməz olaraq qalırdı. Lakin artıq ikinci ildir ki, 10 minin üzərində olması sevindiricidir. Amma bu o demək deyil ki, bu istiqamətdə görülən işlər hazırda tam qaneedicidir və məsələyə özünün müsbət həllini tapan proses kimi də baxa bilərik”.
Elmin Nurinin sözlərinə görə, hazırda Azərbaycanda ümumi tələbə sayı ilə burada oxuyan xarici tələbə nisbətində çox ciddi fərqlər var: “Qarşıdakı 5 ildə 10 min əcnəbi tələbə sayının daha da artacağına isə ümidlər böyükdür. Bunun isə bir neçə səbəbi var. İlk səbəb kimi ötən il Azərbaycanda təşkil olunan COP29 beynəlxalq konfransını misal çəkə bilərik. Bu konfrans bir çox ölkələrin, oradakı universitetlərin, akademik heyətin, o cümlədən tələbələrin marağını çox çəkdi. Orada təşkil olunan təhsil panelləri Azərbaycanda ekoloji təhsilə, bu yönümlü ixtisaslara diqqəti, yaxın perspektivdə görüləcək işləri dünya ictimaiyyətinə bir daha tanıtmış oldu. Hələ COP29 ərəfəsində təhsil mütəxəssislərinin bir çoxunun verdikləri proqnozlara əsasən, məhz bundan sonra Azərbaycana gələcək tələbə axınının sayında artım olacaq”.
Ekspert qeyd edir ki, Qarabağ Universiteti və gələcəkdə yaradılması nəzərdə tutulan bir neçə ali təhsil müəssisəsinə tibb ixtisasına yer verilməsi buraya gələcək tələbə sayının artmasına səbəb olacaq: “Çünki hazırda nəinki Azərbaycanda, hətta bütün dünyada belə əcnəbi tələbələrin ən çox önəm verdiyi ixtisasların başında məhz tibb gəlir. Təsadüfi deyil ki, bizdə təhsil alan əcnəbi tələbələrin bir çoxu da Azərbaycan Tibb Universiteti və Naxçıvan Dövlət Universitetini (tibb ixtisasına görə) seçib. Gələn ildən etibarən, Qarabağ Universitetində tibb ixtisasının olacağı təqdirdə xaricilərin də maraqlarının artacağını görə biləcəyik”.
Lakin ekspert bu istiqamətdəki vəziyyətin hələ yetərincə olmadığı fikrindədir: “Mövcud vəziyyəti tam şəkildə ürəkaçan hesab etmək olmaz. 180 minə yaxın tələbə çoxluğunun yalnız 10 mininin əcnəbi olması çox da sevindirici hal deyil. Təsəvvür edin, təhsil alan hər 18 tələbədən yalnız biri (orta hesabla) əcnəbidir”.
E.Nuri sonda əcnəbi tələbələrin ölkəmizdə qarşılaşdığı mövcud problemlərdən söz açıb: “Əcnəbilərin qarşılaşdıqları əsas problemlər isə oxuduqları universitetlərin infrastrukturu, texniki imkanları, kitabxana və əsasən də kampus sistemidir. Bizdə isə təəssüf ki, kampus sisteminə sahib olan universitet azdır. Əcnəbi tələbə isə bu şərtlərlə tanış olduqdan sonra ölkədə oxumaq fikrindən imtina edir”, - deyərək Elmin Nuri fikrini yekunlaşdırıb.
Bölmənin digər xəbərləri
