ELM VƏ TƏHSİL
Təhsil Nazirliyi: Müddətsiz müqavilə ilə işləmək istəyənlər üçün qeydiyyat prosesi bu gün yekunlaşır
![Təhsil Nazirliyi: Müddətsiz müqavilə ilə işləmək istəyənlər üçün qeydiyyat prosesi bu gün yekunlaşır](/files/2020/1/1200x630/15834929483672932553_1200x630.jpg)
Bakı, 6 mart, AZƏRTAC
Martın 6-da ümumi təhsil müəssisələrində müddətli əmək müqaviləsi əsasında işləyən müəllimlərlə müddətsiz əmək müqaviləsinin bağlanılması üzrə elektron sənədlərin qeydiyyatı başa çatır.
Təhsil Nazirliyindən AZƏRTAC-a bildiriblər ki, qeydiyyat prosesi bu gün saat 23:59-da yekunlaşacaq. Artıq 2 min 800-dən çox namizəd http://www.miq.edu.az/muqavile/ saytı vasitəsilə elektron qeydiyyatdan keçib.
Qeydiyyat başa çatdıqdan sonra elektron ərizələrin yoxlanılması həyata keçiriləcək və nəticələr namizədlərin şəxsi səhifələrinə göndəriləcək.
Qeyd edək ki, müsabiqədə 2018-2019-cu və 2019-2020-ci tədris illəri üçün keçirilmiş müəllimlərin işə qəbulu müsabiqəsində zəruri keçid balını toplayan, pedaqoji istiqamətlər üzrə orta ixtisas və ya ali təhsilli, tutulmayan və ya yeni yaranan vakant yerlərə müddətli əmək müqaviləsi ilə işə qəbul edilmiş müəllimlər iştirak edə bilərlər.