Texnologiyalar parkının rezidenti statusunu əldə edənlər vergi güzəştlərindən yararlanacaqlar
Bakı, 19 dekabr, AZƏRTAC
Vergi Məcəlləsində dəyişiklik ediləcək.
AZƏRTAC xəbər verir ki, bununla bağlı sənəd Milli Məclisinin İqtisadi siyasət, sənaye və sahibkarlıq komitəsinin dekabrın 19-da keçirilən iclasında müzakirəyə çıxarılıb.
Qanun layihəsi sistem inteqrasiyası, proqram təminatının hazırlanması və inkişaf etdirilməsi sahəsində hüquqi və fiziki şəxslərin fəaliyyətlərinin dəstəklənməsi, ölkədə rəqəmsal inkişafin vergi güzəştləri verilməsi yolu ilə təşviq edilməsi məqsədilə hazırlanıb. Qanun layihəsinə görə, texnologiyalar parkından kənar fəaliyyət göstərən sistem inteqrasiyası, proqram təminatının hazırlanması və inkişaf etdirilməsi fəaliyyətini həyata keçirən vergi ödəyiciləri texnologiyalar parkının rezidenti statusunu əldə edirlər və bu əsasda aşağıdakı vergi güzəştlərindən istifadə edirlər:
Sistem inteqrasiyası, proqram təminatının hazırlanması və inkişaf etdirilməsi fəaliyyətini həyata keçirən vergi ödəyicilərində işləyən fiziki şəxslərə gəlir vergisi güzəştlərinin tətbiqi. 2023-cü il yanvarın 1-dən 3 il müddətində aylıq gəlir 8000 manatadək olduqda 0 faiz, 8000 manatdan çox olan məbləğin 5 faizi, 2026-cı il yanvarın 1-dən 7 il müddətində aylıq gəlirin 5 faizi məbləğində;
Bu sahədə fəaliyyət göstərən sahibkarlıq fəaliyyətini həyata keçirən fiziki şəxslərin həmin fəaliyyətdən (o cümlədən həmin fəaliyyətin həyata keçirilməsindən irəli gələrək alıcılara göstərilən təkmilləşmə, texniki dəstək və təlim xidmətləri) əldə etdikləri gəlirlərin gəlir vergisindən, hüquqi şəxslərin isə mənfəət vergisindən azad edilməsi;
Bu sahədə fəaliyyət göstərən şəxslər tərəfindən ödənilən dividenddən texnologiyalar parkının qeydiyyat şəhadətnaməsinin alındığı hesabat ilindən 10 il müddətinə ödəmə mənbəyində verginin tutulmaması;
Bu sahədə fəaliyyət göstərən şəxslərə əmlak və torpaq vergisi sahəsində azadolmaların şamil edilməsi.
Bölmənin digər xəbərləri
