-Əziz tovuzlular!

Əziz bacılar və qardaşlar!

Mən sizin hamınızı ürəkdən salamlayıram. Çox şadam ki, yenidən Tovuzdayam və bu gözəl gündə, əlamətdar gündə sizinlə birlikdəyəm. Bu gün Tovuzda müasir Olimpiya kompleksinin təməlqoyma mərasimində bərabər iştirak edirik. Mən əminəm ki, qısa müddət ərzində, gələn il bu Olimpiya kompleksinin tikintisi başa çatacaq və biz yenə də görüşəcəyik, bir yerdə olacağıq.

Bu Olimpiya mərkəzinin Tovuzda yaradılması çox böyük əhəmiyyət kəsb edən məsələdir. Bu, təkcə Olimpiya idman mərkəzi deyil, eyni zamanda, turizmin inkişafı üçün çox gözəl dəstək olacaqdır. Burada gözəl mehmanxana, üzgüçülük hovuzu, gözəl idman salonları olacaq, yarışların, təlim-məşq toplanışlarının keçirilməsi üçün bütün şərait yaradılacaqdır. Bildiyiniz kimi, Azərbaycanda belə gözəl olimpiya qurğularının tikintisi geniş vüsət almışdır. Bu gün səhər mən Qazax rayonunda gözəl olimpiya mərkəzinin açılışında iştirak edirdim və bir daha gördüm ki, bizim nə qədər böyük potensialımız var, nə qədər böyük imkanlarımız var. İndi Azərbaycanda istənilən infrastruktur obyekti, istənilən müəssisə, sosial obyekt, o cümlədən idman qurğuları dünyanın ən yüksək standartlarına uyğun şəkildə yaradılır. Azərbaycanda son illər ərzində 11 müasir olimpiya idman kompleksi yaradılmışdır və hamısı da ən yüksək dünya standartları səviyyəsindədir. Mən əminəm ki, Tovuzda tikiləcək kompleks də dünya standartları səviyyəsində olacaq və rayonun inkişafına öz töhfəsini verəcəkdir.

Mən çox şadam ki, Tovuzda indi işlər çox sürətlə aparılır. Bu gün buraya gəlməzdən əvvəl Tovuzda görüləcək işlərlə tanış oldum, gördüm ki, çox böyük planlar var: həm abadlıq-quruculuq işləri, həm tarixi yerlərin bərpası, həm də insanları narahat edən sosial problemlərin həlli, su kəmərinin çəkilişi, məktəb tikintisi. Yəni bütün sahələrdə, bütün ölkəmizdə olduğu kimi, Tovuzda da çox böyük imkanlar var. İnkişaf üçün imkanlar var ki, rayon əhalisi daha da gözəl şəraitdə yaşasın. Tovuzun çox böyük potensialı var, çox böyük rayondur. Mən çox istərdim ki, Tovuz çiçəklənsin, inkişaf etsin. Burada güclü sənaye potensialı yaradılsın, kənd təsərrüfatı inkişaf etsin, bütün sosial məsələlər öz həllini tapsın. Əlbəttə, mən əlimdən gələni edəcəyəm ki, biz birlikdə buna nail ola bilək.

Bildiyiniz kimi, Azərbaycanda sosial məsələlərin həllinə çox böyük diqqət göstərilir. Mən dəfələrlə bəyan etmişəm ki, biz insanlar üçün yaşayırıq, insanlara xidmət etmək üçün işləyirik. Mən əsas vəzifəni bunda görürəm. Həm ölkənin iqtisadi potensialını möhkəmləndirmək, həm də insanları narahat edən bütün problemləri uğurla həll etmək - bu iki istiqamətdə Azərbaycanda çox böyük işlər görülübdür, xüsusi proqramlar icra olunur. Biz tam şəkildə bazar iqtisadiyyatı şəraitində yaşayırıq. İqtisadiyyatımızın 81 faizi özəl sektorda formalaşıbdır. Ancaq bununla bərabər, sosial məsələlərin həlli də həmişə diqqət mərkəzindədir və belə də olmalıdır. Bəzi hallarda bazar iqtisadiyyatı prinsipləri tam şəkildə tətbiq olunanda sosial ədalət prinsipləri bir qədər kölgədə qalır. İnkişaf etmiş ölkələrin təcrübəsi, onların keçid dövrünün təcrübəsi bunu göstərir. Biz isə çalışırıq ki, Azərbaycanda bazar iqtisadiyyatı, iqtisadi islahatlar sürətlə aparılmaqla bərabər, insanların həyat səviyyəsi də yaxşılaşsın. Bir çox hallarda çox ciddi islahatlar aparılan zaman cəmiyyətdə sosial gərginlik artır. Bunun qarşısını almaq üçün, sosial məsələlərin həlli üçün müxtəlif proqramlar icra olunur. Minimum əmək haqqı, minimum pensiyalar mütəmadi qaydada qaldırılır. Ehtiyac içərisində yaşayan təbəqə üçün ünvanlı sosial yardım nəzərdə tutulubdur. Yoxsulluqla mübarizə proqramı uğurla icra edilir və Azərbaycanda yoxsulların sayı kəskin şəkildə aşağı düşübdür. Ümid edirəm ki, biz Azərbaycanda yoxsulluğun tamamilə aradan qaldırılmasına nail olacağıq.

Yəni, bu bizim prinsipial mövqeyimizdir, bizim siyasətimizdir və Azərbaycanda görülən işlərin, icra olunan bütün proqramların əsas məqsədi insanlarımızın daha da yaxşı yaşamasıdır. Bunu nəzərə alaraq, bildiyiniz kimi, Azərbaycanda indi yeni müalicə-diaqnostika mərkəzlərinin tikintisi də başlanmışdır. Müxtəlif bölgələrdə bu komplekslərin tikintisi nəzərdə tutulur. Biz vaxtilə olimpiya komplekslərinin tikintisinə başlayanda, - nəzərə almalıyıq ki, bunları bir ildə, iki ildə bütün bölgələrdə etmək mümkün deyil, - çalışırdıq ki, hər bir bölgədə olimpiya kompleksi yaradılsın. İndi isə çalışırıq ki, hər bir rayonda olimpiya kompleksi yaradılsın.

Eyni yanaşma müalicə-diaqnostika mərkəzlərinin tikintisində də mövcuddur. Biz ilk mərhələdə çalışırdıq və nəzərdə tutmuşduq ki, hər bir bölgədə belə mərkəzlər yaradılsın ki, insanlar ondan daha da rahat istifadə edə bilsinlər. Ancaq növbəti mərhələdə, əlbəttə, hər bir rayon mərkəzində belə müalicə-diaqnostika mərkəzinin tikintisi nəzərdə tutulacaqdır. Bu bölgədə Gəncə və Qazaxda nəzərdə tutulmuşdu. Qazaxda işlər artıq başa çatmaq üzrədir, Gəncədə də işlər gedir. Ancaq icra hakimiyyəti başçısının müraciətini və Tovuz rayonunun potensialını, əhalisinin çoxluğunu nəzərə alaraq, mən hesab edirəm ki, biz yaxın vaxtlarda burada da müasir müalicə-diaqnostika mərkəzinin tikintisinə başlamalıyıq. Mən bununla əlaqədar müvafiq göstərişləri verəcəyəm.

Bildiyiniz kimi, indi ölkəmizdə quruculuq, abadlıq işləri çox sürətlə gedir. Bizim iqtisadi potensialımız möhkəmlənir, büdcə gəlirləri və xərcləri kəskin şəkildə artır. İqtisadi artım dünyada analoqu olmayan sürətlə gedir. Biz son üç il ərzində bu göstəriciyə görə dünyada birinci ölkəyik, aparıcı yerdəyik. İqtisadi islahatlar, eyni zamanda, sosial siyasətin güclənməsi - bütün bunlar bizim imkanlarımızı artırır. Azərbaycanın dövlət büdcəsi ildən-ilə yüksək sürətlə artır. Bu yaxınlarda Milli Məclisdə bu məsələyə yenidən baxıldı və Azərbaycanın dövlət büdcəsi yenidən artırıldı. Bu il Azərbaycanın büdcə xərcləri 6,3 milyard manatdır. Bu da təxminən 7,4-7,5 milyard dollar təşkil edir. Biz nəzərə almalıyıq ki, bir neçə il bundan əvvəl dövlət büdcəmiz cəmi 1 milyard dollar idi. Görün, nə qədər artım var, imkanlar nə qədər artıbdır. Əsas məsələ ondadır ki, büdcə xərcləri ilk növbədə, sosial məsələlərin həllinə yönəldilsin, eyni zamanda, infrastruktur layihələrinin həllinə və Azərbaycanda güclü qeyri-neft sektorunun inkişafına yönəldilsin. Bu məqsədlə bizim xüsusi proqramlarımız var, o cümlədən sənaye inkişafı proqramı, regionların sosial-iqtisadi inkişafı dövlət proqramı. Mənə dünən verilən məlumata görə, 2003-cü ilin oktyabr ayından bu ayın sonuna qədər Azərbaycanda 552 min yeni iş yeri açılmışdır. Yəni, bu çox böyük göstəricidir. Bu, onu göstərir ki, bizim iqtisadi inkişaf proqramımız, regional inkişaf proqramımız uğurla icra edilir. Yoxsulluq azalır, işsizlik azalır və imkanlarımız da artır.

Əminəm ki, kənd təsərrüfatında aparılan islahatlar öz bəhrəsini verəcəkdir. İndi biz kənd təsərrüfatında artımı görürük. Müxtəlif proqramlar həyata keçirilir. “Aqrolizinq” Səhmdar Cəmiyyəti yaradılıbdır. Azərbaycanda artıq kənd təsərrüfatı texnikasının istehsalına başlanılıb və əminəm ki, yaxın zamanlarda kəndlilərə çox böyük sayda texnika veriləcəkdir. Kənd təsərrüfatına dəstəyin artırılması üçün büdcədə 80 milyon manat dotasiya nəzərdə tutulubdur. Sahibkarlığın, kənd təsərrüfatının, qeyri-neft sektorunun, yerli sənayenin inkişafı, idxalı əvəz edə biləcək məhsulların istehsalı - Azərbaycanın qeyri-neft sektoruna aid olan ümumi inkişaf konsepsiyası budur. Bir daha demək istəyirəm ki, biz bu sahədə böyük uğurlar qazanmışıq. Ancaq, əlbəttə ki, hələ böyük problemlər var və onların həlli bizim üçün ən başlıca vəzifədir. Elə olmalıdır ki, Azərbaycanda bütün sosial məsələlər öz həllini tapsın. Azərbaycanda minimum əmək haqqı insanın minimum tələbatını ödəsin, baxmayaraq ki, bu sahədə də böyük artım var. Bu gün Azərbaycanda orta əmək haqqı 200 dollardır. İlin sonuna qədər yenə də artacaqdır. Ancaq onu da etiraf etməliyik ki, bütün kateqoriyalardan olan insanlar bu əmək haqqını almır. Büdcədən maliyyələşən təşkilatlarda işləyən insanların əmək haqqı baxmayaraq ki, bir neçə dəfə qaldırılıb, ancaq hələ ki, bizi qane etmir.

Azərbaycanda orta pensiya 58 manatdır. Əvvəlki illərlə müqayisədə çox böyük artımdır. Amma bu pensiya ilə insan özünü təmin edə bilmir. Bütün bu problemləri biz bilirik və onu da bilirik nə etməliyik. İlk növbədə, öz gücümüzə arxalanmalıyıq. İlk növbədə, iqtisadi potensialı maksimum şəkildə işə salmalıyıq. Bizim böyük təbii sərvətlərimiz - neftimiz, qazımız var. Heydər Əliyevin neft strategiyası uğurla icra edilir və Azərbaycana həm siyasi, həm də iqtisadi dividendlər gətirir. İndi ölkəmiz beynəlxalq müstəvidə özünə layiq möhkəm yerini tutubdur. Azərbaycan Avropanın enerji təhlükəsizliyi məsələlərində çox fəal iştirak edir və bizim təşəbbüslərimiz, siyasətimiz, baxışlarımız bölgədə enerji siyasətinin formalaşmasında aparıcı rol oynayır. Bu, belədir və biz bu imkanlardan səmərəli istifadə etməliyik. Elə etməliyik ki, bu böyük təbii sərvətlər, bu kapital insan kapitalına çevrilsin. Bunun üçün olimpiya kompleksləri, məktəblər, xəstəxanalar, bütün sosial infrastruktur, iş yerləri, zavodlar, fabriklər lazımdır və biz bunu edirik.

Əgər biz müqayisə üçün istənilən ölkənin inkişaf dinamikasını götürsək görərik ki, istər ümumi daxili məhsulun artımına görə, istərsə də, yoxsulluğun azaldılmasına, iş yerlərinin açılmasına görə və xüsusi infrastruktur layihələrinin həyata keçirilməsinə görə ən sürətlə, ən dinamik inkişaf edən ölkə Azərbaycandır. Bu, məni çox sevindirir. Onu göstərir ki, bizim siyasətimiz düşünülmüş siyasətdir, ölkəmizin inkişafına gözəl şərait yaradır.

Mən xatırlayıram, prezident seçkiləri ərəfəsində Tovuzda olarkən, burada insanlarla görüşərkən camaatla, vətəndaşlarla söhbət edərkən demişdim ki, əgər bu yüksək vəzifəyə seçilsəm, əlimdən gələni edəcəyəm ki, ölkənin qarşısında duran bütün problemlərin həlli üçün çalışım və onları həll edim. Mən çox şadam, çox sevinirəm və çox böyük qürur hissi ilə deyə bilərəm ki, son 3-4 il ərzində Azərbaycan böyük və şərəfli yol keçibdir. Həm beynəlxalq müstəvidə, həm də ölkə daxilində gedən proseslər, iqtisadi islahatlar, ölkədə sabitliyin, vətəndaş birliyinin möhkəmlənməsi, vətəndaş cəmiyyətinin formalaşması, xalqla iqtidar arasında birliyin mövcudluğu və möhkəmlənməsi - bütün bunlar ölkəmiz üçün çox vacibdir.

Biz görürük, tarixdən də bilirik və indiki zəmanədə başqa ölkələrdə baş verən hadisələri də görürük. Görürük ki, harada siyasət xalq tərəfindən dəstəklənirsə, o ölkədə sabitlik də var, əmin-amanlıq da var, insanlar da normal yaşayırlar və heç bir böhranlı vəziyyət yaranmır. Mən çox şadam ki, Azərbaycanda bu gün məhz belə vəziyyət mövcuddur. 1990-cı illərin əvvəllərində Azərbaycanda hansı vəziyyət olduğunu biz hamımız yaxşı xatırlayırıq. Ölkəmizin gələcəyi üçün böyük təhlükələr var idi, ölkə idarəolunmaz vəziyyətdə idi. İndi isə ulu öndərin fəaliyyəti nəticəsində 10 il ərzində və ondan sonrakı illərdə o qədər böyük işlər görülüb, Azərbaycan dövlətçiliyinin elə əsasları qoyulub ki, bizim müstəqilliyimiz o qədər möhkəmlənib ki, indi bizim qarşımızda üfüqlər açıqdır, yolumuz açıqdır. Biz sadəcə olaraq, hamımız birləşib əl-ələ verərək ölkəmizin hərtərəfli inkişafı üçün çalışmalıyıq. Bu ab-hava bu gün Azərbaycanda var. Mən bölgələrə çox tez-tez gedirəm, görürəm, vəziyyətlə tanış oluram. Görürəm ki, insanlarda böyük nikbinlik, ruh yüksəkliyi var, gələcəyə inam var. Ölkəmizin inkişafı üçün böyük arzular var, böyük niyyətlər var. Ölkəmizin uğurlu inkişafı hər bir vətənpərvər insanı ruhlandırır. Bizə əlavə güc verir və insanları daha da böyük işlərin görülməsinə sövq edir.

Əziz dostlar, mən bu gözəl gündə sizi bir daha salamlamaq istəyirəm. Tovuzlular həmişə Azərbaycanın ərazi bütövlüyünün keşiyində durmuşlar. Həmişə düşmənlə üz-üzə dayanaraq, ona çox layiqli cavablar vermiş, öz doğma torpaqlarını, Azərbaycanın ərazi bütövlüyünü müdafiə etmişlər, həmişə mübariz olmuşlar. Bu gün Azərbaycanın gözəl inkişaf proseslərində tovuzlular çox fəal iştirak edirlər. Əminəm ki, Tovuz Azərbaycanın ən inkişaf etmiş rayonlarından birinə çevriləcəkdir, mən buna şübhə etmirəm. Çünki sizin gözəl planlarınız var, niyyətləriniz var, təşəbbüsləriniz var. Təbii ki, burada hələ çoxlu açılışlar olacaq və biz bundan sonra da həmişə birlikdə olacağıq.

Sizi bir daha təbrik edirəm və cansağlığı arzulayıram. Arzu edirəm ki, sizin həyatınızda hər şey yaxşı olsun. Sağ olun.