Türk Dövlətləri Təşkilatı vahid güc mərkəzinə çevrilir ŞƏRH
Bakı, 24 fevral, AZƏRTAC
Türk Dövlətləri Təşkilatı (TDT) yeni güc birliyidir və bu birliyin formalaşdırılmasında Türkiyə ilə Azərbaycan müstəsna rola malikdir. Çünki bu birliyi dövrün reallıqları doğurur və müasir dünyada güc sahibi olmadan dövlətin suverenliyini qorumaq mümkün deyil. Azərbaycan bunu öz taleyində uzun illər hiss edib. Belə ki, ölkəmiz möhkəm iqtisadiyyata, mübariz orduya, birliyə malik olmadığı üçün 20 faiz torpağı uzun illər işğal altında qaldı, şəhərləri və kəndləri viran edildi. Ulu Öndər Heydər Əliyevin ölkəyə rəhbərlik etdiyi, İlham Əliyevin Prezident olduğu 20 ildə iqtisadiyyatda əsaslı dönüş yaradıldı, ordu quruculuğuna xüsusi diqqət yetirildi, ölkədə ictimai-siyasi sabitlik möhkəmləndirildi, beynəlxalq aləmdə münasibətlər genişləndirildi, vətəndaş həmrəyliyi, birliyi təmin edildi. Məhz bütün bunların nəticəsində Azərbaycan güclü dövlətə çevrilib, ölkə Prezidenti dünyaya haqq-ədalət diktəsini edib, bir dövlət rəhbəri, Ali Baş Komandan kimi qələbələrimizə, uğurlarımıza yol açıb.
AZƏRTAC xəbər verir ki, bu fikirləri Milli Məclisin Aqrar siyasət komitəsinin sədri Tahir Rzayev söyləyib.
Deputat deyib: “Azərbaycanın bu uğurları, sərbəst, müstəqil siyasət yürütməsi, milli maraqları hər şeydən üstün tutması, heç kimin diktəsinə əməl etməməsi sözsüz ki, böyük dövlətləri narahat etməli idi və belə də oldu. Düşmən üzərində tarixi Qələbəmizdən sonra dövlətimizə qarşı yönələn təzyiqlər - saxta bəyanatların verilməsi, qətnamələrin qəbul edilməsi, şantaj, böhtan xarakterli məlumatların yayılması, bir çox ölkə parlamentlərində əsassız sənədlərin hazırlanması və digər amillər bunun göstəricisidir. Dövlətimizin başçısı bunu yaxşı bilirdi və xalqımızı xəbərdar edirdi. Sözsüz ki, bu birlik Türkiyə ilə qardaşlığın möhkəmlənməsindən, Türk dövlətlərinin bir məqsəd uğrunda mübarizəsindən keçir. Məhz buna görə də Türk Dövlətləri Təşkilatının formalaşdırılması, təşkilatlandırılması Türk dünyası üçün - xalqlarımıza yönəldilən mənfur niyyətlərin qarşısının alınması üçün vacib və taleyüklü məsələdir. Bu birliyin təmin olunmasında, Türk dövlətlərinin bir araya gəlməsində və birləşməsində Prezident Rəcəb Tayyib Ərdoğanın və Prezident İlham Əliyevin fəaliyyəti, rolu əvəzsizdir”.
Tahir Rzayevin sözlərinə görə, Türk Dövlətləri Təşkilatının bir güc mərkəzinə çevrilməsinin vacibliyi hər iki dövlət rəhbərinin çıxışlarında dəfələrlə səsləndirilib, görüşlərdə, yığıncaqlarda gündəmə gətirilib və mənfur niyyətlərin aradan qaldırılmasında əvəzsiz rola malik olub: “Azərbaycan Prezidenti fevralın 18-də Türkiyəyə rəsmi səfəri zamanı bu birliyin vacibliyini və günümüz üçün əhəmiyyətini əsaslı faktlarla - bəzi ölkələrin Türk dövlətlərinə təsiri, çirkin məqsədləri əsasında qabartmış, Türkiyə-Azərbaycan birliyi, qardaşlığı nümunəsində türkdilli xalqları birliyə səsləyib. Bu çağırış daha da güclənmək, gücə güc qatmaq, düşmənləri sarsıtmaq, insanları birləşdirmək və xalqları xoşbəxt etmək, dövlətləri inkişaf etdirmək, bəlalardan və təsirlərdən qurtarmaq baxımından çox əhəmiyyətlidir. Prezident İlham Əliyev bu çağırışı andiçmə mərasimində daha qürurla etdi və ədalətsiz dünyada Türk dövlətlərinin demokratiyaya, insan haqlarına, beynəlxalq normalara, müharibələrin və münaqişələrin qarşısının alınmasına böyük önəm verdiklərini söyləyərək dedi: “Biz beynəlxalq təşkilatlarla bağlı bundan sonra da öz addımlarımızı atacağıq, ilk növbədə, Türk Dövlətləri Təşkilatı çərçivəsində səylərimizi davam etdirəcəyik. Bu, bizim üçün prioritetdir, mən bunu açıq demək istəyirəm, yəqin ki, indi aparılan siyasət də hər kəsə bunu aydın göstərir. Bu, bizim üçün əsas beynəlxalq təşkilatdır, çünki bu, bizim ailəmizdir. Bizim başqa ailəmiz yoxdur. Bizim ailəmiz Türk dünyasıdır”. Bu bir həqiqətdir. Bu ilin iyul ayında Türk Dövlətləri Təşkilatının Şuşada keçiriləcək qeyri-rəsmi Zirvə görüşü deyilən çağırışları, həqiqətləri təsdiqləyir və Türk xalqlarının birliyinə, möhkəmlənməsinə, dövlətlərin xoşbəxt, qorxusuz gələcəyinə yeni yollar açacaq”.
Bölmənin digər xəbərləri
