Türk dünyası təbii fəlakət fonunda Türkiyə ilə həmrəylik nümayiş etdirdi
Bakı, 9 mart, AZƏRTAC
Türk dövlətləri Kahramanmaraş mərkəzli fevral zəlzələləri fonunda Türkiyəyə aktiv dəstək nümayiş etdirib.
AZƏRTAC bu barədə Anadolu informasiya agentliyinə istinadla xəbər verir.
Azərbaycan qardaş Türkiyəyə ən tez kömək əli uzadan ölkələrdən biri olub
Azərbaycan zəlzələ bölgəsinə ilk gündən etibarən 867 xilasedici və tibbi personal göndərib. Onlar axtarış-xilasetmə əməliyyatı zamanı 53 nəfəri xilas edib. Bundan başqa, Azərbaycandan fəlakət zonasına 10 mindən çox çadır, 2 min 500-ə yaxın elektrik generatoru, 20 mindən çox qızdırıcı, 32 min ədyal, həmçinin tonlarla ərzaq göndərilib.
Dövlət Neft Şirkəti - SOCAR tibbi yardım, yanğınsöndürən, axtarış-xilasetmə və AFAD maşınlarını pulsuz yanacaqla təmin edib. Azərbaycandan Türkiyəyə yardım üçün 15 milyon dollara yaxın vəsait köçürülüb. Həmçinin 15 təyyarə, 365 yük maşını və 25 dəmiryol qatarı ilə qardaş ölkəyə yardımlar çatdırılıb.
Qazaxıstan zəlzələdən zərər çəkənlərə 100 ədəd yurt və 15 milyon dollar yardım göndərib
Türkiyəyə ilk yardım əlini uzadan ölkələrdən biri də Qazaxıstan olub. Onlar zəlzələdən zərər çəkənlər üçün 100 ədəd yurt, 55 ton humanitar yük və 15 milyon dollar yardım göndərib. Qazaxıstan hökuməti, həmçinin qardaş ölkəyə 1 milyon dollar vəsait köçürüb. Qazaxıstan sakinləri isə türkiyəli soydaşları üçün 500 tondan çox humanitar yardım toplayıb və 100 dən çox ənənəvi yurt alıb.
Qaziantep, Nurdağı və Hatayda fəaliyyət göstərən 100 nəfər qazaxıstanlı xilasedici dağıntılar altından 7 nəfəri xilas edib, həmçinin 88 nəfərin cəsədini çıxarıb.
Özbəkistanlı aşpazlar zəlzələ zonasında 10 min nəfər üçün yemək bişirib
Özbəkistanlı aşpazlar zəlzələ zonasında 10 min nəfərə gündə üç dəfə yemək bişirib. Daşkənd şəhərində Türkiyə səfirliyi tərəfindən koordinasiya olunan yardım kampaniyasında 600 min dollardan çox ianə yığılıb. Bütün ölkə ərazisindən toplanan 600 tondan çox humanitar yardım qardaş ölkəyə göndərilib.
Yüz nəfərlik xilasedici heyət dağıntılar altından 18 nəfəri sağ çıxarıb. Həmçinin zəlzələ zonasında 71 hərbi həkimdən ibarət səhra hospitalı fəaliyyət göstərib.
Qırğızıstan fəlakət bölgələrində 124 çadır qurub
Bişkekdə Qırğızıstan vətəndaşları tərəfindən 55 ton humanitar yük toplanıb. Təbii fəlakətdən zərər çəkənlər üçün açılan hesaba milyon dollara yaxın ianə yığılıb. Eyni zamanda ölkənin Maliyyə Nazirliyi tərəfindən açılan vahid depozit hesabına 1 milyon 117 min dollar köçürülüb. Qırğızıstanın Fövqəladə Hallat Nazirliyi zəlzələ bölgələrinə 124 çadır göndərib.
Türkmənistanın köməyi
Türkmənistanda yerli qeyri-hökumət təşkilatları və Türkiyənin Aşqabaddakı diplomatik nümayəndəliyi tərəfindən təşkil olunan kampaniya çərçivəsində zəlzələdən zərər çəkənlərə 8 mindən çox ədyal, 380 çarpayı göndərilib. Həmçinin təbii fəlakət zonasına 20 elektrik generatoru, 60 qızdırıcı, 11 tondan çox paltar, 44 tondan çox tibbi ləvazimat və 67 ton ərzaq çatdırılıb.
Xatırladaq ki, fevralın 6-da Türkiyənin Kahramanmaraş vilayətində yeddi baldan yuxarı iki dağıdıcı zəlzələ baş verib. Yeraltı təkanlar ölkənin 10 vilayətində böyük dağıntılara və insan tələfatına səbəb olub. Son məlumata görə, təbii fəlakət nəticəsində həlak olanların sayı 46 min 104 nəfərə çatıb. Mütəxəssislərin hesablamalarına görə, zəlzələnin Türkiyəyə vurduğu zərər 100 milyard dolları ötə bilər. Afterşokların isə hələ altı ay davam edəcəyi gözlənilir.
Bölmənin digər xəbərləri
