TÜRKİYƏ BÖYÜK MİLLƏT MƏCLİSİNİN SƏDRİ ÖMƏR İZGİNİN AZƏRBAYCANA RƏSMİ SƏFƏRİ
HAVA LİMANINDA QARŞILANMA
Türkiyə Böyük Millət Məclisinin sədri Ömər İzgi fevralın 7-də Bakıya rəsmi səfərə gəlmişdir.
Binə hava limanında qardaş Türkiyə parlamentinin başçısını Milli Məclisin sədri Murtuz Ələsgərov, parlament sədrinin birinci müavini Arif Rəhimzadə, Milli Məclis Aparatının rəhbəri Səfa Mirzəyev, Türkiyənin Bakıdakı səfiri Əhməd Ünal Çeviköz, Azərbaycanın Ankaradakı səfiri Məmməd Əliyev qarşıladılar.
Cənab Ömər İzgi hava limanında jurnalistlərin suallarına cavab verərək dedi ki, həmkarı Murtuz Ələsgərovun dəvəti ilə ölkəmizə səfərə gəlmişdir. Səfərdən əsas məqsəd ölkələrimizin parlamentləri arasında əməkdaşlığın inkişafı, habelə regional və beynəlxalq problemlərlə bağlı məsələləri müzakirə etməkdir. Hörmətli qonaq vurğuladı ki, Türkiyə ilə Ermənistan arasında hər hansı münasibətlər yaradılması məsələsinə gəldikdə isə, Azərbaycanın işğal olunmuş əraziləri azad edilməyincə və bütün qaçqınlar öz yurd-yuvalarına qayıtmayınca, bu, tamamilə istisna olunur.
X X X
ŞƏHİDLƏR XİYABANINI ZİYARƏT
Elə həmin gün Türkiyə Böyük Millət Məclisinin sədri Ömər İzgi və onu müşayiət edən şəxslər Şəhidlər xiyabanını ziyarət edərək, Azərbaycanın azadlığı, suverenliyi və ərazi bütövlüyü uğrunda canlarından keçmiş oğul və qızlarımızın xatirəsini ehtiramla andılar.
Türkiyə parlamentinin başçısı qəhrəmanların xatirəsinə ehtiram əlaməti olaraq, “Əbədi məşəl” abidəsinin önünə əklil qoydu, Şəhiqlər xiyabanının fəxri qonaqlar kitabına ürək sözlərini yazdı.
Ömər İzgi bolşevik-daşnak silahlı birləşmələri ilə döyüşlərdə azərbaycanlıları müdafiə edərək həlak olmuş türk əsgərlərinin xatirəsinə Şəhidlər xiyabanında ucaldılmış Anım abidəsinin önünə də əklil qoydu.
Şəhidlər xiyabanını ziyarət zamanı Ömər İzgini Milli Məclis sədrinin birinci müavini Arif Rəhimzadə, parlament sədrinin müavini Gövhər Baxşəliyeva, Türkiyənin Bakıdakı səfiri Əhməd Ünal Çeviköz, Azərbaycanın Ankaradakı səfiri Məmməd Əliyev müşayiət edirdilər.
X X X
MİLLİ MƏCLİSİN SƏDRİ MURTUZ ƏLƏSGƏROV İLƏ GÖRÜŞ
Ölkəmizdə rəsmi səfərdə olan Türkiyə Böyük Millət Məclisinin sədri Ömər İzgi və onu müşayiət edən şəxslər fevralın 7-də Milli Məclisə getdilər. Burada əvvəlcə Ömər İzgi ilə Murtuz Ələsgərov arasında təkbətək görüş oldu.
Sonra parlament sədrləri görüşü geniş tərkibdə davam etdirdilər.
Milli Məclisin sədri türkiyəli həmkarını səmimiyyətlə salamlayaraq dedi ki, Ömər İzginin rəsmi səfəri Azərbaycan Prezidenti Heydər Əliyevin və ölkə parlamenti rəhbərliyinin dəvəti ilə həyata keçirilir. Murtuz Ələsgərov əmin olduğunu bildirdi ki, bu səfər ölkələrimizin qardaşlıq münasibətlərinin inkişafında yeni mərhələ olacaqdır.
Murtuz Ələsgərov vurğuladı ki, ölkələrimizin dövlət başçılarının səfərləri və görüşləri Türkiyə ilə Azərbaycan arasında əlaqələrin genişlənməsində böyük rol oynamışdır. Azərbaycan Prezidenti Heydər Əliyev Türkiyəyə dəfələrlə səfər etmiş, bu səfərlər zamanı qarşılıqlı surətdə faydalı müqavilələr və sazişlər imzalanmışdır. Türkiyənin sabiq prezidenti Süleyman Dəmirəl və indiki dövlət rəhbəri Əhməd Necdət Sezər də ölkəmizdə olmuşlar. Məhz dövlət başçılarının sıx ünsiyyətləri sayəsində Türkiyə-Azərbaycan münasibətləri strateji tərəfdaşlıq səviyyəsinə qalxmışdır.
Milli Məclisin sədri parlamentlərarası əlaqələrin inkişafından söhbət açaraq, ölkələrimizin qanunvericilik orqanları nümayəndələrinin NATO-nun Parlament Assambleyası, Avropa Şurasının Parlament Assambleyası və Qara Dəniz İqtisadi Əməkdaşlıq Təşkilatının Parlament Assambleyası kimi mötəbər beynəlxalq təşkilatlarda uğurlu əməkdaşlığından ətraflı danışdı. O, Milli Məclisin və Türkiyə Böyük Millət Məclisinin sədrləri arasında görüşlərin əhəmiyyətini xüsusi vurğulayaraq dedi ki, Azərbaycan parlamenti nümayəndə heyətinin Ankaraya ötənilki səfəri zamanı dövlətimizin başçısı Heydər Əliyevin təşəbbüsü ilə Bakıda Atattürk Mədəniyyət Mərkəzinin açılması barədə xəbəri Türkiyə parlamentinin üzvləri alqışlarla qarşılamışlar.
Murtuz Ələsgərov Ermənistan-Azərbaycan, Dağlıq Qarabağ münaqişəsi barədə də məlumat verərək, razılıq hissi ilə vurğuladı ki, türk xalqı Azərbaycanın ədalətli mövqeyini daim müdafiə edir.
Cənab Ömər İzgi səmimi qəbula və qonaqpərvərliyə görə təşəkkürünü bildirərək dedi ki, Azərbaycana gəlmək Türkiyə Böyük Millət Məclisinin bütün 540 üzvünün səmimi arzusu idi. Bizi ümumi köklər, ümumi din birləşdirir, maraq və məqsədlərimiz çulğaşır.
Türkiyə parlamentinin sədri Qafqaz regionunda sülh və sabitlik yaradılması məsələsinə toxunaraq xüsusi vurğuladı ki, Azərbaycanın razılığı olmadan Türkiyə dövləti Ermənistanla əlaqələrin sahmanlanması istiqamətində bir addım belə atmayacaq və ermənilərin işğal etdiyi Azərbaycan əraziləri tamamilə azad olunmayınca bundan söhbət də gedə bilməz.
Sonra Ömər İzgi ölkələrimizin parlamentləri arasında əlaqələrin genişləndirilməsi məsələlərindən ətraflı söhbət açdı, Milli Məclisin nümayəndə heyətini yaxın vaxtlarda Türkiyəyə səfərə dəvət etdi.
Görüşdə Milli Məclis sədrinin birinci müavini Arif Rəhimzadə, parlament sədrinin müavinləri Gövhər Baxşəliyeva və Ziyafət Əsgərov, Türkiyənin Bakıdakı səfiri Əhməd Ünal Çeviköz və Azərbaycanın Ankaradakı səfiri Məmməd Əliyev iştirak edirdilər.
Bölmənin digər xəbərləri
