TÜRKİYƏ MİLLİSİNİN VYANA MÖCÜZƏSİ
AZƏRTAC-ın xüsusi müxbiri xəbər verir ki, iyunun 20-də futbol üzrə Avropa çempionatının dörddəbir final mərhələsinin ikinci oyununda Türkiyə və Xorvatiya yığma komandaları Vyanada “Ernst Happel” stadionunda qarşılaşmışlar.
Oyunu 51 min tamaşaçı yeri olan stadionda və Vyanada yaradılmış azarkeş zolaqlarında 200 mindən artıq futbol azarkeşi izləmişdir.
Türkiyənin Baş naziri Rəcəb Tayyib Ərdoğan və Xorvatiyanın Baş naziri İvo Sanaderin də seyr etdikləri əsas oyunun hissəsində hesab açılmamışdır. Əlavə vaxtda Türkiyə futbolçular təşəbbüsü ələ alsalar da, qapıçı Rüştünün səhvindən istifadə edən xorvatlar İvan Klasniçin 119-cu dəqiqədə başla vurduğu dəqiq zərbə ilə irəli çıxmışlar. Ruhdan düşməyən Türkiyə millisi oyunun son saniyələrində hücuma keçərək, Semih Şəntürkün sərrast zərbəsi ilə hesabı bərabərləşdirməyə nail olmuşdur - 1:1.
Qalibi müəyyənləşdirmək üçün təyin edilmiş penaltiləri dəqiq yerinə yetirən Türkiyə millisi 3:1 (ümumi hesabda isə 4:2) hesabı ilə parlaq qələbə qazanmışdır.
İyunun 25-da Bazel şəhərinin “Sankt Yakob Park” stadionunda keçiriləcək yarımfinal mərhələsinin ilk oyununda Türkiyə millisinin rəqibi Almaniya yığma komandası olacaqdır.
Bölmənin digər xəbərləri
